Ku wa gatatu tariki ya 13 Mutarama 2010, Inama y‘Abaminisitiri yateraniye muri Village Urugwiro, iyobowe na Nyakubahwa Perezida wa Repubulika, Paul KAGAME.

1. Inama y’Abaminisitiri yemeje imyanzuro y’Inama y’Abaminisitiri yo ku itariki ya 16 Ukuboza 2009, imaze kuyikorera ubugororangingo.

2. Inama y’Abaminisitiri yasuzumye raporo ku ivugururwa ry’imiterere n’imikorere by‘Ikigo cy’Igihugu gishinzwe Iterambere (RDB) yakozwe n’Itsinda (Task Force) ryashyizweho n’Inama y’Abaminisitiri yo ku wa 15 Nzeri 2009, iyikorera ubugororangingo.

3. Inama y‘Abaminisitiri yagejejejweho raporo yakozwe ku gutuza abimuwe ahahoze ishyamba rya Gishwati n’ingamba zikosora ibitaragenze neza, isaba ko izo ngamba zihutishwa, abaturage bakava mu gihirahiro.

4. Inama y’Abaminisitiri yemeje gahunda yo guha buri mwana w’Umunyarwanda inkongoro y’amata; isaba ko ibishoboka gukorwa vuba, bikorwa, igatangira.

5. Inama y’Abaminisitiri yemeje ko Itegeko No 16/2005 ryo ku wa 18/08/2005 ryerekeye imisoro itaziguye ku nyungu rivugururwa kugira ngo amasosiyeti y’Abashoramari bakeneye kuguza amafaranga hanze kubera ko imishinga minini bafite mu Rwanda batayibonera inguzanyo muri Banki z’imbere mu gihugu, bashobore kubona iyo nguzanyo bitabahombeje ariko itsinda ribishinzwe (Tax Policy Committee) rikajya risesengura ubusabe bwa buri Mushoramari rifatanyije n’izindi nzego za Leta zishinzwe imirimo igiye gushorwamo imari.

6. Inama y’Abaminisitiri yemeje imishinga y’Amategeko ikurikira:

 Umushinga w‘Itegeko rishyiraho Amategeko agenga Umuryango, imaze kuwukorera ubugororangingo;

 Umushinga w‘Itegeko ryerekeye kohererezanya abakurikiranyweho ibyaha;

 Umushinga w‘Itegeko rigena ishyirwaho n’imikorere y’amashuri y’abaforomo n’ababyaza.

7. Inama y’Abaminisitiri yemeje Amateka akurikira:

 Iteka rya Perezida riha imbabazi Bwana Luis Duenas Herrera umu Espagnol wakoreraga Sosiyeti Espina Obras Hidraulicas mu Rwanda, wari warakatiwe igihano cy‘igifungo cy’umwaka umwe kubera icyaha cyo kunyereza imisoro.

 Iteka rya Minisitiri w’Intebe ryirukana burundu ba Ofisiye bato babiri (2) muri Polisi y’Igihugu kubera amakosa akomeye bakoze mu kazi. Abo ni : Inspector of Police Innocent RUDAKUBANA na Assistant Inspector of Police Ubard MUHABANYI.

 Iteka rya Minisitiri w’Intebe risezerera ba Ofisiye bato babiri (2) muri Polisi y’Igihugu kubera impamvu z’uburwayi. Abo ni : Chief Inspector of Police Jacques MUDATSIKIRA na Inspector of Police KAGABO Rafiki.

 Iteka rya Minisitiri rishyira mu kiruhuko cy’izabukuru ba Su-Ofisiye cumi na bane(14) muri Polisi y’Igihugu hakurikijwe ibiteganywa n‘amategeko;

 Iteka rya Minisitiri risezerera ba Su-Ofisiye bane (4) muri Polisi y’Igihugu kubera impamvu z’uburwayi;

 Iteka rya Minisitiri ryirukana burundu ba Su-Ofisiye makumyabiri (20) muri Polisi y’Igihugu kubera amakosa akomeye bakoze mu kazi;

 Iteka rya Minisitiri rishyiraho urutonde n’imiterere y’imirimo mibi ku bana n’ibyiciro by’ibigo bibujijwe kubakoresha;

 Iteka rya Minisitiri rigena iby’ingenzi bikubiye mu masezerano y’akazi yanditse;

 Iteka rya Minisitiri rigena ibiruhuko by’ingoboka;

 Iteka rya Minisitiri rigena uburyo amahugurwa, iyigisha n’ibiruhuko bigendana nayo, bishyirwa mu bikorwa;

 Iteka rya Minisitiri rishyiraho igihe cyo kwimenyereza umwuga w’ubuganga.

8. Inama y’Abaminisitiri yemeje inyandiko ivugurura Politiki y’ubucukuzi bw’amabuye y’agaciro na kariyeri mu Rwanda.

9. Inama y’Abaminisitiri yemeje ko aba bakurikira bahagararira ibihugu byabo mu Rwanda nka Ambasaderi:

 Bwana Laurent CONTINI w’u Bufaransa, ufite icyicaro i Kigali;

 Bwana MOHAMED MESSAOUD, wa Tunisia ufite icyicaro i Kinshasa;

 Bwana ZAINOL RAHIM BIN ZAINUDDIN wa Malaysia, ufite icyicaro i Nairobi.

10. Inama y’Abaminisitiri yemeje ko Bwana KAYUMBA Olivier aba Umujyanama wa kabiri muri Ambasade y’u Rwanda i Paris, Bwana UWAMUNGU Joseph aba Umujyanama wa kabiri i Buruseli.

11. Mu bindi

a) Minisitiri w’Ingabo yamenyesheje Inama y’Abaminisitiri ko ku va tariki 29 Ugushyingo kugeza 04 Ukuboza 2009, i Cartagena muri Columbia habereye Inama yo gusuzuma aho gahunda yo gushyira mu bikorwa ikumira ry’ikoreshwa, ihunikwa, ikorwa, n’ihererekanya ry’ibisasu bitegwa abantu mu butaka (mine) n’isenywa ryabyo rigeze. Kandi ko iyo nama yashimiye u Rwanda ko rwarangije iyo gahunda mu kwezi k’Ukwakira 2009, ubu u Rwanda rukaba rugeze ku ntera yo kumenyekana nk’igihugu kitagira ibisasu mu butaka bwacyo (mine free country).

Yayimenyesheje kandi ko Umunyarwanda Col. MUZUNGU Munyaneza wari Umugaba w‘Ingabo za Afurika y’Iburasirazuba zihoraho (Eastern African Standby Brigade) yarangije manda ye y’imyaka itatu. Ku itariki ya 15 Mutarama 2010 azakorana ihererekanya bubasha n’Umunyasudani wamusimbuye.

b) Umunyamabanga wa Leta ushinzwe iterambere rusange n’Imibereho Myiza y’Abaturage muri MINALOC yagejeje ku Nama y’Abaminisitiri amabwiriza ya Minisitiri yerekeye imiterere n’itangwa ry’ikarita iranga impunzi mu Rwanda.

Iri tangazo rishyizweho umukono na Minisitiri ushinzwe Imirimo y’Inama y’Abaminisitiri

MUSONI Protais