Ejo kuwa gatatu tariki ya 02 Werurwe
2005, Inama y’Abaminisitiri
yateraniye muri Village Urugwiro,
iyobowe na Nyakubahwa Perezida wa Repubulika: Paul KAGAME.
Imaze
kwemeza gahunda y’inama, Inama y'Abaminisitiri yafashe ibyemezo
bikurikira:
1. Inama
y’Abaminisitiri yemeje ibyemezo by’Inama y’Abaminisitiri yo ku itariki
ya 16/02/2005, imaze kubikorera ubugororangingo.
2. Imaze
kwerekwa aho igikorwa cyo gukusanya imodoka za Leta zigomba kugurishwa
kigeze, ndetse no kuzisura aho ziri mu kigo cya Polisi, Inama
y’Abaminisitiri yemeje imyanzuro y’itsinda ry’Abaminisitiri ryashinzwe
kugena ingamba ku mikoreshereze y’ibikoresho bya Leta. Ibyo birareba:
a) imicungire
y’imodoka Leta izasigarana;
b) gushyiraho amafaranga ntarengwa yo
gukoresha za telefoni mu
mirimo ya Leta;
c) kwemeza ingengabihe yerekeye uburyo
bwo kwimurira mu mazu ya Leta ibigo bikodesha;
d) kugabanya inama zikorerwa hirya no hino,
kandi izibaye ngombwa zigakorerwa ahantu hadahenze, nko mu byumba
by’inyubako za Leta.
3. Inama
y’Abaminisitiri yemeje iteka rya Minisitiri rivana amamodoka amwe mu
mutungo rusange wa Leta rikayashyira mu mutungo bwite wa Leta. Izo modoka zigiye gutangira kugurishwa.
4. Inama
y’Abaminisitiri yemeje iteka rya Minisitiri w’Intebe rishyiraho
Umuyobozi wa RIAM: Bwana KABANDANA Marc, n’iteka rya Minisitiri
w’Intebe rishyiraho Umuyobozi w’Ikigo cya Leta gishinzwe Kongera
Ubushobozi bw’Abakozi n’ubw’Inzego z’Imirimo (HIDA): Bwana KARAKE
MUTSINZI Charles.
5. Inama
y’Abaminisitiri yemeje ko Lt. Col Tom BYABAGAMBA, aba Umuyobozi (CO) wa «Republican
Guard/Garde Républicaine».
6. Inama
y’Abaminisitiri yemeje bamwe mu bagize inama y’ubutegetsi b’ibigo
bikurikira:
a) RIAM (Ikigo Nyarwanda kigisha
iby’Ubuyobozi n’Imicungire y’Abantu n’Ibintu):
-
MUPENZI George
-
MUKAMANA Berthilde
-
KAMPAYANA Augustin
-
BUKI Octave Hakiba
b) HIDA (Ikigo
cya Leta gishinzwe Kongera Ubushobozi bw’Abakozi n’ubw’Inzego
z’Imirimo):
-
YISA Claver Kamana
-
SEBAGABO Barnabé
-
MUKANDUTIYE Sarah
-
KANKIRIHO Darius
-
NTABANA Yves
-
MUKANTAGWERA Eugénie
-
BUSABIZWA Parfait.
7. Inama
y’Abaminisitiri yemeje iteka rya Minisitiri w’Intebe risesa inama
y’ubutegetsi ya Komisiyo y’Igihugu ishinzwe Kurwanya SIDA (CNLS) yari
iriho ubu.
8. Inama
y’Abaminisitiri yemeje ko abakozi bakuru bakoraga mu Bunyamabanga
Nshingwabikorwa bwa CNLS basezererwa bose, uretse Umunyamabanga Nshingwabikorwa,
Kontabule n’ushinzwe imari.
9. Inama
y’Abaminisitiri yasuzumye raporo yagejejweho n’Umunyamabanga wa Leta
ushinzwe Igenamigambi muri Minisiteri y’Imari n’Igenamigambi ku
byerekeye aho imishyikirano yo kugurisha Rwandatel isosiye TERRACOM
igeze, Inama y’Abaminisitiri isaba ko iyo mishyikirano ikomeza kandi
ikihutishwa.
10. Inama
y’Abaminisitiri yashyigikiye icyifuzo cy’Umuryango w’Abibumbye usaba
Leta y’u Rwanda kugira abasirikare itanga bo gufasha mu ngabo zirinda
intumwa zawo i Khartoum muri Sudani, Inama y’Abaminisitiri yemeje ko u
Rwanda ruzabohereza.
11. Mu
bindi:
a) Minisitiri w’Uburinganire
n’Iterambere ry’Umuryango y'ibukije Inama y’Abaminisitiri ko
umunsi mpuzamahanga w’abagore uba kuwa 08/03/2005. Ku rwego rw’Igihugu
uwo munsi uzabera kuri Stade i Nyamirambo mu Mujyi wa Kigali kandi
uzizihirizwa no mu Ntara zose.
b) Minisitiri w’Abakozi ba Leta,
Amahugurwa n’Umurimo yamenyesheje Inama y’Abaminisitiri
ko amasezerano MIFOTRA yagiranye na MIDA (Migration
Internationale pour le Développement en Afrique/International
Migration for African Development) akomeza.
c) Minisitiri w’Ububanyi n’Amahanga
n’Ubutwererane yamenyesheje Inama y’Abaminisitiri
ko:
- Inama ihuza u Rwanda n’impuguke
z’Umuryango wa «East African Community» isuzuma uko u Rwanda
rwawinjiramo, ibera mu Rwanda kuva ku itariki ya 28 Gashyantare
kuzageza ku itariki ya 05/03/2005, igenda neza, akaba yizera ko
izagera ku myanzuro ishimishije.
- Nyuma y’iseswa rya OBK/KBO, no
kugabana umutungo wayo, inzu yari icyicaro cyayo i Kigali, yahawe u
Rwanda.
d) Minisitiri w’Ibikorwa Remezo
yamenyesheje Inama y’Abaminisitiri ko Inteko Rusange ya 24 y’Umuryango
Nyafurika «Shelter Afrique», Umuryango ugamije guteza imbere imiturire
muri Afurika, izabera i
Kigali kuva ku itariki ya 15 kugeza ku ya 18 Kamena 2005.
e) Minisitiri w’Ubutegetsi bw’Igihugu,
Imiyoborere Myiza, Amajyambere Rusange n’Imibereho Myiza y’Abaturage
yamenyesheje Inama y’Abaminisitiri ko i Kigali kuva ku itariki ya 06
kugeza ku ya 08/06/2005, hazateranira inama y’Abaminisitiri bashinzwe
ibyo kwegereza ubuyobozi n’ubushobozi abaturage (Decentralisation)
muri Afurika.
f)
Umunyamabanga wa Leta ushinzwe Inganda no Guteza Imbere
Ishoramari muri Minisiteri y’Ubucuruzi, Inganda, Guteza Imbere
Ishoramari, Ubukerarugendo n’Amakoperative yamenyesheje Inama
y’Abaminisitiri ko kuva ku itariki ya 23 Werurwe kugeza ku itariki ya
25 Nzeri 2005, mu Buyapani hazabera imurika mpuzamahanga rizahuza
ibihugu 125.
Minisiteri y’Ubucuruzi, Inganda, Guteza Imbere Ishoramari,
Ubukerarugendo n’Amakoperative, ifatanije n’izindi nzego, irategura
uko u Rwanda ruzitabira iryo murikagurisha kugira ngo ruzakuremo
inyungu zigaragara.
g)
Umunyamabanga wa Leta ushinzwe Amazi na Mine muri Minisiteri
y’Ubutaka, Ibidukikije, Amashyamba, Amazi na Mine yamenyesheje Inama
y’Abaminisitiri ko kuva ku itariki ya 14 kugeza ku itariki ya 18
Werurwe 2005 i Kigali hateganijwe inama mpuzamahanga y’Abaminisitiri
bashinzwe amazi mu kibaya cy’uruzi rwa Nile (NBI) -Nile Basin
Initiative -
h) Umunyamabanga wa Leta ushinzwe
Ingufu n’Itumanaho muri Minisiteri y’Ibikorwa Remezo yamenyesheje
Inama y’Abaminisitiri ko imishyikirano hagati y’intumwa za Leta y’u
Rwanda n’isosiyete «Dane Associates» igenda neza, ko hasigaye
kunonosora no gushyira umukono ku masezerano yo kubyaza amashanyarazi
gazi metani yo mu kiyaga cya Kivu.
g) Umunyamabanga wa Leta ushinzwe
Ubutaka n’Ibidukikije muri Minisiteri y’Ubutaka, Ibidukikije,
Amashyamba, Amazi na Mine yamenyesheje Inama y’Abaminisitiri ko ku
itariki ya 03 Werurwe 2005 ari umunsi Nyafurika wo kurengera
ibidukikije. Mu Gihugu hazitabwaho igikorwa cyo kurwanya isuri ku
migezi, inzuzi n’ibiyaga.
Kigali,
kuwa 02/03/2005.