None kuwa gatatu tariki ya 09
Gashyantare 2005, Inama y’Abaminisitiri yateraniye muri Village
Urugwiro, iyobowe na Nyakubahwa Perezida wa Repubulika: Paul
KAGAME.
Imaze kwemeza gahunda y’inama, Inama
y'Abaminisitiri yafashe ibyemezo bikurikira:
1.
Inama y’Abaminisitiri yemeje ibyemezo by’Inama y’Abaminisitiri
yo ku itariki ya 26/01/2005, imaze kubikorera
ubugororangingo.
2.
Inama
y’Abaminisitiri yasuzumye inyandiko ijyanye n’ivugururwa ry’inshingano
n’imiterere y’ikigo CEPEX, yemeza ko CEPEX izakora nka «special
unit/unité spéciale» ikorera muri Minisiteri y’Imari
n’Igenamigambi.
3.
Inama
y’Abaminisitiri yasuzumye inyandiko ijyanye n’imyanya y’imirimo
y’ikigo gishinzwe gutunganya itangwa ry’amasoko ya Leta (NTB), yemeza
ko kizakora nk’ikigo cya Leta.
4.
Inama
y’Abaminisitiri yemeje inyandiko ya politiki y’ubuzima.
5.
Inama y’Abaminisitiri yagejejweho inyandiko igaragaza uko
ikibazo cy’Ibitaro byitiriwe Umwami Fayçal kuva byatangira gukora
kugeza ubu giteye, yemeza
sitati nshya yabyo nka ASBL, yemeza kandi amasezerano iyo ASBL
izagirana na Leta y’u Rwanda.
6. Inama
y’Abaminisitiri yemeje ko KAYOBOKE Paul na RUGABA Albert bakora mu
biro by’u Rwanda muri Shenzhen High-Tech Park bizaba
bishinzwe:
- Gushishikariza abashoramari n’abacuruzi
b’abashinwa gushora imari yabo mu Rwanda ;
- Gushaka ibigo byo mu Rwanda byagirana
ubufatanye n’amasosiyete n’ibigo by’abashinwa hagamijwe guteza imbere
ikoranabuhanga n’ubushakashatsi mu Rwanda.
KAYOBOKE Paul ashinzwe Ikoranabuhanga mu
by’itumanaho (ICT).
RUGABA
Albert, ashinzwe ishoramari n’ubucuruzi (investment and
trade)
Bazaba ari ba «Attachés Commerciaux/Commercial
Attachés» muri Ambasade y’u Rwanda mu Bushinwa.
7. Mu
rwego rwo kuvugurura imikorere y’ibigo bishamikiye kuri Minisiteri
y’Ubuhinzi n’Ubworozi, Inama y’Abaminisitiri yemeje ko ibigo byayo
byari bisanzweho, bivugururwa, bikavamo ibigo bine bishya
bikurikira :
- Ikigo cy’Igihugu cy’Ubushakashatsi mu
by’Ubuhinzi (ISAR) kivuguruye;
- Ikigo cy’Igihugu cyo Guteza Imbere
Ubuhinzi (Office Rwandais de Développement de l’Agriculture/Rwanda
Agriculture Development Authority) ;
- Ikigo cy’Igihugu cyo Guteza Imbere
Ibikomoka ku Matungo/Office Rwandais de Développement des Ressources
Animales/Rwanda Animal Resources Development
Authority ;
- Ikigo cy’Igihugu cyo Kugenzura Ubwiza
bw’Ibikomoka ku buhinzi-bworozi/Agence Rwandaise de Certification et
de Contrôle de Qualité/National Agency for Quality Control and
Certification.
8.
Inama y’Abaminisitiri yashyize mu myanya abayobozi
bakurikira :
a) MILENGE John: Perezida w’Inama
y’Ubutegetsi y'isosiyete prime holdings icunga «Intercontinental Hotel
kigali na Kivu Sun Hotel Gisenyi » ;
b)MUHONGERWA MASOZERA Claudine: «Resident Board
Director» mu isosiyete prime holdings
c) Dr. KABAGABO Chantal: Umuyobozi wungirije
ushinzwe amasomo muri KHI;
d) KAZIGE Eugène : Umuyobozi wungirije
ushinzwe ubutegetsi n’imari muri KHI;
e) GATERA James : Umuyobozi wungirije wa Banki ya
Kigali ;
f) RUTAYISIRE NGANGO Emmanuel :
Umuyobozi w’umushinga ukorera muri Minisiteri y’Ubucuruzi, Inganda,
Guteza Imbere Ishoramari, Ubukerarugendo n’Amakoperative witwa
«Integrated Framework Project».
g) TURATSINZE Théogène : Umuyobozi Mukuru wa
Banki y’u Rwanda Itsura Amajyambere (BRD) ;
h) Major General RWARAKABIJE Paul : umwe mu
bagize Komisiyo yo gusubiza mu buzima busanzwe abasirikare bavuye ku
rugerero.
9.
Inama y’Abaminisitiri yashyize mu myanya inyuranye yo mu
buyobozi bw’Ingabo z’Igihugu:
-
ba ofisiye jenerali (4)
-
ba ofisiye bakuru (36)
-
ba ofisiye bato (9).
10. Mu
bindi:
a) Minisitiri w’Umutekano mu Gihugu
yamenyesheje Inama y’Abaminisitiri iby’urugendo avuyemo
Addis-Abeba muri Ethiopia
mu nama yigiwemo ibyerekeye urujya
n’uruza rw’abantu (migration) muri Afurika.
b) Minisitiri w’Ububanyi n’Amahanga
n’Ubutwererane yamenyesheje Inama y’Abaminisitiri ko i Kigali ku
matariki ya 17 na 18 Gashyantare 2005, hazateranira inama
y’Abaminisitiri bashinzwe gukurikirana ishyirwa mu bikorwa
ry’imyanzuro y’inama yabereye i Dar-es-Salaam, yerekeye umutekano mu
bihugu byo mu Karere k’Ibiyaga Bigali.
c) Minisitiri w’Ubutaka, Ibidukikije,
Amashyamba, Amazi na Mine yamenyesheje Inama y’Abaminisitiri
iby’ubutumwa avuyemo i Brazzaville mu gihugu cya Kongo, aho yari
yaherekeje Nyakubahwa Minisitiri w’Intebe mu nama y’Abakuru b’ibihugu
n’aba za Guverinoma, yigaga ibyo kurengera amashyamba mu bihugu bya
Afurika yo hagati.
d) Umunyamabanga wa Leta ushinzwe
Igenamigambi muri Minisiteri y’Imari n’Igenamigambi yamenyesheje Inama
y’Abaminisitiri gahunda y’uko umunsi w’umusoreshwa mu mwaka wa 2005
uzizihizwa n’aho uzabera :
- ku rwego rw’Intara : uzizihizwa
hagati y’itariki ya 12 n’iya 22 Gashyantare 2005 ;
- ku rwego rw’Igihugu : uzizihizwa
tariki ya 25 Gashyantare 2005 mu Mujyi wa Kigali kuri «Stade Régional»
y’i Nyamirambo.Insanganyamatsiko ni : «Imisoro n’amahôro
biteza imbere ishoramari mu Gihugu».
e) Umunyamabanga wa Leta ushinzwe
Amajyambere Rusange n’Imibereho Myiza y’Abaturage muri Minisiteri
y’Ubutegetsi bw’Igihugu, Imiyoborere Myiza, Amajyambere Rusange
n’Imibereho Myiza y’Abaturage yamenyesheje Inama y’Abaminisitiri ko
Komiseri Mukuru ushinzwe Impunzi ku Isi azagenderera u Rwanda ku
itariki ya 4 Werurwe 2005.