None kuwa gatatu tariki ya 20 Kamena 2007,
Inama y’Abaminisitiri yateraniye muri Village Urugwiro,
iyobowe na Nyakubahwa Perezida wa Repubulika : Paul KAGAME.
Imaze kwemeza gahunda y’inama, Inama
y'Abaminisitiri yafashe ibyemezo bikurikira:
1. Inama y’Abaminisitiri yemeje imyanzuro
y’Inama y’Abaminisitiri yo ku itariki ya 13 Kamena
2007, imaze kuyikorera ubugororangingo.
2. Inama y’Abaminisitiri yagejejweho
ingamba zo guteza imbere ibicuruzwa byoherezwa mu mahanga (Export
Promotion Strategy)
3. Inama y’Abaminisitiri yemeje umushinga
w’Itegeko ryemerera kwemeza burundu amasezerano yerekeye
iyinjizwa rya Repubulika y’u Rwanda mu Muryango wa Afurika
y’Iburasirazuba yashyiriweho umukono i Kampala kuwa 18
Kamena 2007.
4. Inama y’Abaminisitiri yemeje gahunda
ijyanye no gushakira igisubizo Serivisi zitarabonerwa aho zikorera
mu nyubako za Leta.
5. Inama y’Abaminisitiri yemeje Iteka rya Perezida risezerera
Ofisiye Mukuru muri Polisi y’Igihugu kubera impamvu z’uburwayi
: CP. KARERA Denis.
6. Inama y’Abaminisitiri yashyize abayobozi
mu myanya ku buryo bukurikira:
- Prof. Pamela ABBOTT, Umuyobozi w’Inama y’Igihugu
y’Amashuri Makuru;
- Dr. RUTAGWENDA Theogene : Umuyobozi wa RARDA
- HAKIZIMANA Patrice : Umuyobozi wa RADA
- Abagize petroleum Unit muri MINICOM:
• RUTABINGWA Alex: Umuyobozi
• OPIRAH Robert
7. Mu bindi
- Minisitiri w’Urubyiruko, Umuco na Siporo
yamenyesheje Inama y’Abaminisitiri ko kuwa 21 Kamena 2007
ari umunsi mukuru wa Muzika.
- Minisitiri w’Ubucuruzi, Inganda, Guteza
Imbere Ishoramari, Ubukerarugendo n’Amakoperative yamenyesheje
Inama y’Abaminisitiri ko ku itariki ya 30 Kamena 2007
hazaba umuhango wo kwita ingagi amazina. Kubera iyo mpamvu umuganda
w’ukwezi kwa gatandatu wimuriwe ku itariki ya 7 Nyakanga
2007.
- Umunyamabanga wa Leta muri Minisiteri y’Ibikorwa
Remezo ushinzwe Ingufu n’Itumanaho yamenyesheje Inama
y’Abaminisitiri ko mu rugendo Nyakubahwa Perezida wa Repubulika
aherutsemo mu Bushinwa isosiyete yo muri icyo Gihugu yitwa ZTE
yamugeneye impano igamije guteza imbere itumanaho mu Mujyi wa
Kigali.
- Umunyamabanga wa Leta muri Minisiteri y’Ubutegetsi
bw’Igihugu, Imiyoborere Myiza, Amajyambere Rusange n’Imibereho
Myiza y’Abaturage ushinzwe Amajyambere Rusange n’Imibereho
Myiza y’Abaturage yagejeje ku Nama y’Abaminisitiri
raporo ku rugendo, we n’Umunyamabanga wa Leta muri MINECOFIN
ushinzwe Igenamigambi, bavuyemo muri Ethiopia aho bari bagiye
kureba ingamba icyo Gihugu cyafashe mu kongera umusaruro hagamijwe
kwihaza mu biribwa.
Kigali,
kuwa 20/06/2007
Minisitiri
muri Primature ushinzwe Itangazamakuru