None kuwa gatatu tariki ya 02 Ugushyingo 2005, Inama y'Abaminisitiri yateraniye muri Village Urugwiro, iyobowe na Nyakubahwa Perezida wa Repubulika, Paul KAGAME.
Imaze kwemeza gahunda y'inama, Inama y'Abaminisitiri yafashe ibyemezo bikurikira :
1. Inama y'Abaminisitiri yemeje ibyemezo by'Inama y'Abaminisitiri byo ku itariki ya 26/10/2005.
2. Inama y'Abaminisitiri yemeje i mishinga y'amategeko ajyanye n'ubutabera (ubucamanza n'ubushinjacyaha) akurikira :
a) Umushinga w'Itegeko ngenga rihindura kandi ryuzuza Itegeko ngenga n°07/2004 ryo ku wa 25/04/2004 rigenga imiterere, imikorere n'ububasha by'Inkiko;
b) Umushinga w'Itegeko rihindura kandi ryuzuza Itegeko n°06/bis/2004 rigenga Abacamanza n'Abakozi b'Inkiko;
c) Umushinga w'Itegeko ngenga rihindura kandi ryuzuza Itegeko ngenga n°03/2004 ryo ku wa 20/03/2004 rigena imiterere, ububasha n'imikorere by'Ubushinjacyaha;
d) Umushinga w'Itegeko ngenga rihindura kandi ryuzuza Itegeko ngenga n°01/2004 ryo ku wa 29/01/2004 rigena imitunganyirize, imikorere n'ububasha by'Urukiko rw'Ikirenga;
e) Umushinga w'Itegeko ngenga rihindura kandi ryuzuza Itegeko ngenga n°02/2004 ryo ku wa 20/03/2004 rigena imiterere, ububasha n'imikorere by'Inama Nkuru y'Ubucamanza;
3. Inama y'Abaministiri yemeje inyandiko ku itegurwa ya PRSP II izitwa Gahunda y'iterambere igamije kurwanya ubukene, igizwe n'ibice bitatu aribyo:
a) Ibimaze kugerwaho na Gahunda yo Kurwanya Ubukene (Annual Process Report 2005) ya PRSP I ;
b) Ibizibandwaho na gahunda izakurikizwa mu gutegura PRSP II izitwa Gahunda y'Iterambere igamije Kurwanya Ubukene (Economic Development for Poverty Reduction Strategy/Stratégie pour le Développement Economique en vue de la Réduction de la Pauvreté) ;
c) Uburyo bushya bw'igenzura ry'ishyirwa mu bikorwa ry'iyo gahunda (Monitoring and Evaluation/Suivi et Evaluation):
4. Inama y'Abaminisitiri yemeje :
a) Umushinga w'Itegeko ryemerera kwemeza burundu amasezerano ashyiraho ikigo gishinzwe gucunga impanuka mu Karere k'Ibiyaga Bigari n'Ihembe ry'Afurika, yashyiriweho umukono i Naïrobi ( Kenya ) ku wa 15 Kanama 2005.
b) Iteka rya Perezida ryemeza burundu amasezerano ashyiraho ikigo gishinzwe gucunga impanuka mu Karere k'Ibiyaga Bigari n'Ihembe ry'Afurika/Regional Disaster Management Center of Excellence/Centre Régional d'Excellence pour la Gestion des Désastres, yashyiriweho umukono i Naïrobi (Kenya) ku wa 15 Kanama 2005.
5. Inama y'Abaminisitiri yemeje Iteka rya Minisitiri w'Intebe rishyira umukozi mu mwanya muri Perezidansi ya Repubulika ari we Madamu Venney U.R MUNYANEZA, uzakora nk'Umuforomokazi muri “State House”.
6. Inama y'Abaminisitiri yemeje ko Bwana BIGIRIMANA Valens, aba Umunyamabanga wihariye w' Umunyamabanga wa Leta ushinzwe Amashuri Makuru muri MINEDUC:
7. Inama y'Abaminisitiri yemeje ko Madamazela MUJAWIMANA Jeanne d'Arc aba Umunyamabanga Wihariye wa Nyakubahwa Visi Perezida wa SENA, Madamu MUKANTABANA Marie.
8. Inama y'Abaminisitiri yemeje Iteka rya Perezida rishyira Bwana KARANGWA Claudien wari Umukuru w'Intara ya Byumba mu kiruhuko cy'izabukuru.
9. Inama y'Abaminisitiri yemeje ko :
- Isosiyeti KOBIL RWANDA ikodesha ibigega bya Leta bya Peteroli byo mu Gatsata.
- Iyo sosiyeti ariyo izagura “stations” za Shell Rwanda.
Iby'iryo kodesha n'iryo gura bizaca mu mishyikirano hagati ya KOBIL RWANDA na Leta y'u Rwanda .
10. Inama y'Abaminisitiri yemeje ko ejo ku wa kane tariki ya 03/11/2005 ari umunsi w'ikiruhuko kuberako ari umunsi wa Id al Fitr.
11. Mu bindi :
- Minisitiri w'Imali n'Igenamigambi, yagejeje ku Nama y'Abaminisitiri gahunda y'imyaka itatu y'amahugurwa y'ababaruramari n'abagenzuzi b'imari igamije kubongerera ubushobozi.
- Minisitiri w'Ubuhinzi n'Ubworozi yamenyesheje Inama y'Abaminisitiri ko imihango yo gutangiza Inama y'Abaminisitiri b'Ibihugu bya Afurika bashinzwe Ubworozi yari iteganijwe ejo ku wa kane yimuriwe ku wa gatanu. Abatumiwe basabwe kuhagera bitarenze saa mbiri.
- Minisitiri muri Primature ushinzwe Itangazamakuru yamenyesheje Inama y'Abaminisitiri ko tariki ya 7/11/2005 ari umunsi nyafurika ngaruka mwaka w'Itangazamakuru.
- Minisitiri w'Ubutaka, Ibidukikije, Amashyamba, Amazi na Mine yamenyesheje Inama y'Abaminisitiri ko ku itariki ya 05/11/2005 inzego za Leta zikorera mu Mujyi wa Kigali zizategurira kuri Mont Kigali, Jali na Rebero ahazaterwa ibiti ku wa 14/11/2005.
- Minisitiri w'Ubuzima yamenyesheje Inama y'Abaminisitiri ko yatanze amabwiriza yibutsa abaturarwanda ko bibujijwe kunywera itabi ahantu hateraniye abantu benshi.
- Umunyamabanga wa Leta muri Minisiteri y'Ububanyi n'Amahanga n'Ubutwererane ushinzwe Ubutwererane yamenyesheje Inama y'Abaminisitiri ko ku matariki ya 28-29/12/2005 i Kigali hateganijwe inama y'Abanyarwanda baba mu mahanga.
- Umunyamabanga wa Leta muri Minisiteri y'Imari n'Igenamigambi ushinzwe Igenamigambi yamenyesheje Inama y'Abaminisitiri ko i Kigali kuwa 17/11/2005, hari inama ku ishoramari riciriritse.
Kigali, kuwa 02/11/2005
Minisitiri
muri Primature ushinzwe Itangazamakuru