None ku wa gatatu tariki ya 03 Ugushyingo 2004,
Inama y’Abaminisitiri yateraniye muri Village Urugwiro, iyobowe na
Nyakubahwa Perezida wa Repubulika: Paul KAGAME.
Imaze
kwemeza gahunda y’inama, Inama y'Abaminisitiri yafashe ibyemezo
bikurikira:
1. Inama
y’Abaminisitiri yemeje ibyemezo by’Inama y’Abaminisitiri yo ku itariki
ya 27/10/2004, imaze kubikorera ubugororangingo.
2. Inama
y’Abaminisitiri yemeje imiterere n’inshingano by’inzego
z’imirimo muri Perezidansi ya Repubulika, muri Serivisi za
Minisitiri w’Intebe n’inzego z’imirimo mu Ntara, mu Turere
n’Imijyi.
3. Inama
y’Abaminisitiri yemeje umushinga w’itegeko ngenga rihindura itegeko
ngenga n°14/2004 ryo ku itariki ya 26/05/2004 rishyiraho amategeko
rusange yerekeye ibigo bya Leta.
4. Inama
y’Abaminisitiri yemeje inyandiko igenewe Inama y’Abaminisitiri ku
itegurwa ry’inama y’abaterankunga iteganijwe kuva ku itariki ya 08
kugeza ku ya 11 Ukuboza 2004, igamije iterambere/Development
Partners Meeting/Réunion avec des Partenaires au
Développement.
5. Inama
y’Abaminisitiri yemeje ko Bwana MBANDA Théoneste aba Umunyamabanga
wihariye wa Minisitiri w’Ibikorwa Remezo.
6. Inama
y’Abaminisitiri yemeje amateka ya Minisitiri w’Intebe
akurikira :
- iteka rya Minisitiri w’Intebe rikura
Bwana KAJONJORI Samson ku mwanya w’Umunyamabanga Nshingwabikorwa
w’Intara ya Byumba.
- iteka rya Minisitiri w’Intebe rikura
Bwana RUKUNDO Emmanuel ku mwanya w’Umunyamabanga Nshingwabikorwa
w’Intara ya Gikongoro.
- iteka rya Minisitiri w’Intebe rikura
Bwana RUKEBA Eugène ku mwanya w’Umunyamabanga Nshingwabikorwa w’Intara
y’Umutara.
7. Inama
y’Abaminisitiri yemeje ko ku itariki ya 15/11/2004 ari umunsi
w’ikiruhuko cya EID AL FITRI.
8. Nk’uko byemejwe
n’Inama y’Abaminisitiri ko buri wa gatanu wa mbere w’ukwezi hazaba
umuganda ku wa gatanu tariki ya 05/11/2004, umuganda uzakorwa mu
tugari mu gitondo, ariko nyuma ya saa sita abantu bajye ku kazi
kabo.
9. Mu bindi:
a)
Minisitiri
w’Ubutabera yamenyesheje Inama y’Abaminisitiri ko ku itariki ya
09/11/2004 hazaba inama yo kwamagana ihohoterwa ry’abana,
ikazanafatirwamo ingamba zikomeye zo kurirwanya.
Yagejeje
kandi ku Nama y’Abaminisitiri raporo y’ubutumwa avuyemo mu nama
y’Abaminisitiri b’ubutabera b’ibihugu bya Afurika bihuriye ku rurimi
rw’igifaransa yabereye mu Kirwa cya Maurice kuva tariki ya 25 kugeza
ku ya 30 Ukwakira 2004.
b)
Umunyamabanga wa Leta muri Minisiteri
y’Ubuzima, ushinzwe Kurwanya SIDA n’Izindi Ndwara z’Ibyorezo
yamenyesheje Inama y’Abaminisitiri ko ku wa gatanu tariki ya
05/11/2004 hazaba inama izahuza Abafasha b’Abakuru b’Ibihugu igamije
gufata ingamba zo kurwanya SIDA mu myaka 2 iri imbere. Iyo nama
izayoborwa na Nyakubahwa Jeannette KAGAME.