None kuwa gatatu tariki ya 04 Gicurasi 2005, Inama y'Abaminisitiri yateraniye muri Village Urugwiro, iyobowe na Nyakubahwa Perezida wa Repubulika: Paul KAGAME.
Imaze kwemeza gahunda y'inama, Inama y'Abaminisitiri yafashe ibyemezo bikurikira:
1. Inama y'Abaminisitiri yemeje ibyemezo by'Inama y'Abaminisitiri yo ku itariki ya 27/04/2005, imaze kubikorera ubugororangingo.
2. Inama y'Abaminisitiri yemeje iteka rya Minisitiri rizamura mu ntera abasirikare 2 146 ba Su-Ofisiye mu Ngabo z'Igihugu.
3. Inama y'Abaminisitiri yemeje iteka rya Minisitiri w'Intebe rizamura mu ntera ya Majoro ba Kapiteni bakurikira:
- Capt Justus MAJYAMBERE
- Capt James ABAINE
- Capt John Bosco KABERA
- Capt Karuranga GATETE
- Capt Jeanot RUHUNGA KIBEZI
- Capt Jean Chrysostome NGENDAHIMANA
- Capt Jomba GAKUMBA
4. Inama y'Abaminisitiri yemeje umushinga w'Itegeko ryemerera kwemeza burundu amasezerano y'inguzanyo Leta y'u Rwanda yahawe n'Ikigega cya OPEC Fund ingana na miliyoni icumi z'Amadorari y'Abanyamerika (10 000 000 USD), igenewe umushinga wo kubaka umuhanda Gitarama-Ngororero-Mukamira.
5. Inama y'Abaminisitiri yemeje inyandiko y'amasezerano hagati ya Leta y'u Rwanda na Banki Nkuru y'Igihugu ku birebana n'ingwate yo korohereza abashora imari mu by'ubuhinzi n'ubworozi („Facilité de Garantie Agricole/Agriculture Guarantee Facility“).
6. Inama y'Abaminisitiri yemeje ibikorwa bikubiye mu iteganyamigambi ( business plan) ry'imyaka 5 (2005-2009) rya Banki y'u Rwanda Itsura Amajyambere (BRD).
7. Inama y'Abaminisitiri yemeje iteka rya Minisitiri w'Intebe rikura ku mirimo Umunyamabanga Mukuru muri Minisiteri y'Ibikorwa Remezo, Bwana BIZIMANA Emmanuel
8. Inama y'Abaminisitiri yemeje ko Bwana Amin JAVER akurwa ku mirimo y'Umuyobozi Mukuru wa Rwandair Express.
9. Inama y'Abaminisitiri yemeje ko Ishami ry'Icungamutungo (Management Faculty/Faculté de Gestion) ryari muri KIST ryimurirwa mu Ishuri Ritanga Inyigisho Zihanitse mu byerekeye Imari n'Amabanki (SFB).
10. Mu bindi
- Minisitiri w'Ubuzima yagejeje ku Nama y'Abaminisitiri iby'inama avuyemo muri Burkina Faso yahuje Abaminisitiri bo mu bihugu bigize Umuryango Nyafurika wita ku nyigisho zo mu mashuri makuru (CAMES/Conseil Africain et Malgache pour l'Enseignement Supérieur).
- Minisitiri w'Ubutegetsi bw'Igihugu, Imiyoborere Myiza, Amajyambere Rusange n'Imibereho Myiza y'Abaturage yagejeje ku Nama y'Abaminisitiri iby'inama avuyemo yahuje intumwa z'u Rwanda n'iz'u Burundi ku kibazo cy'Abanyarwanda bahungiye mu Burundi kuva mu ntangiriro z'ukwezi kwa 4 ngo barebere hamwe uko batahuka.
- Minisitiri w'Ububanyi n'Amahanga n'Ubutwererane yamenyesheje Inama y'Abaminisitiri ko hateganyijwe inama y'ubutwererane (Permanent Joint Commission) hagati y'u Rwanda na Tanzaniya ku matariki ya 09-10/5/2005.
- Minisitiri w'Uburinganire n'Iterambere ry'Umuryango yamenyesheje Inama y'Abaminisitiri ko itariki ya 15/5/2005 ari Umunsi Mpuzamahanga w'Umuryango.
- Minisitiri w'Urubyiruko, Umuco na Siporo yamenyesheje Inama y'Abaminisitiri ko amakipe y'u Rwanda yitwara neza muri iki gihe mu mikino y'umupira w'amaguru ya CECAFA ibera i Mwanza muri Tanzaniya, no mu mukino w'umupira w'intoki (Volley Ball) ubera muri Benin.
Yayimenyesheje kandi ko ikipe y'u Rwanda, Amavubi, yatumiwe mu Budage kuzakina n'ikipe y'icyo gihugu mu kwezi kwa 7.
- Umunyamabanga wa Leta muri Minisiteri y'Ububanyi n'Amahanga n'Ubutwererane ushinzwe Ubutwererane yamenyesheje Inama y'Abaminisitiri ko Abanyarwanda baba muri Sénégal bazakoresha ibirori byo kumenyekanisha u Rwanda muri icyo gihugu ku matariki ya 14-15/5/2005.
Kigali, kuwa 04/05/2005.
Minisitiri
muri Primature ushinzwe Itangazamakuru