None kuwa gatatu tariki ya 07 Ukuboza 2005, Inama y'Abaminisitiri yateraniye muri Village Urugwiro, iyobowe na Nyakubahwa Perezida wa Repubulika, Paul KAGAME.
Imaze kwemeza gahunda y'inama, Inama y'Abaminisitiri yafashe ibyemezo bikurikira :
1. Inama y'Abaminisitiri yemeje ibyemezo by'Inama y'Abaminisitiri byo ku itariki ya 30/11/2005, imaze kubikorera ubugororangingo.
2. Inama y'Abaminisitiri yemeje inyandiko zikurikira zitegura ishyirwa mu bikorwa rya politike y'ivugururwa ry'inzego z'imitegekere y'Igihugu :
a) Ingengabihe y'ibikorwa by'ivugururwa ry'inzego z'igihugu/managing the reform process - a roadmap of activities/gestion du processus de la réforme - feuille de route ;
b) Ivugurura ry'inzego z'ubutegetsi : inshingano, inzego z'imirimo n'imicungire y'abakozi mu gihe cy'ivugurura ;
c) Iteka rya Perezida rigena inshingano, imiterere n'imikorere y'Umudugudu, Akagari n'Umurenge ;
d) Iteka rya Perezida rigena uburyo amatora y'abayobozi b'Umudugudu, Akagari n'Umurenge akorwa ;
e) Iteka rya Perezida rigena imikorere y'inzego z'ibanze mu gihe cy'inzibacyuho ;
f) Gahunda y'amatora y'Inzego z'Ibanze mu 2006.
3) Inama y'Abaminisitiri yashyizeho Abagize Inama y'Ubutegetsi y'Ikigo cy'Ibarurishamibare :
- KARURANGA Canisius : perezida
- NDUWIMANA Laetitia
- NZABONIKUZA Joseph
- Dr NDAGIJIMANA Uzziel
- RWIGEMA Faustin
- UWINEZA Chantal
- NZAYISENGA Canisius
4) Inama y'Abaminisitiri yemeje umushinga w'Itegeko rigena inshingano, imiterere n'imikorere y'Urwego rw'Igihugu rushinzwe Intwari z'Igihugu n'Imidari y'Ishimwe.
5) Inama y'Abaminisitiri yemeje politiki yo kuboneza urubyaro n'ingamba zo kuyishyira mu bikorwa.
6) Inama y'Abaminisitiri yemeje umushinga w'Itegeko rivugurura kandi ryuzuza Itegeko n° 24/2003 ryo kuwa 14/08/2003 rigena imikorere n'imiterere, y'Inama y'Igihugu y'Urubyiruko.
7) Inama y'Abaminisitiri yashyize mu myanya Abayobozi ku buryo bukurikira :
a) ELECTROGAZ :
- Co-Managing Director/Co-Directeur Général:
MILENGE John
- Co-Technical Director/Co-Directeur Technique:
KANAMUGIRE Aloys
b) RURA :
- Umuyobozi Mukuru: ZIMURINDA François
c) MININFRA:
- Umuyobozi wa Unité/Unit y'Ingufu: KARANI Alexis
8) Inama y'Abaminisitiri yagize Madam Kansiime Mbabazi Odette Umunyamabanga wihariye wa Minisitiri w'imari n'igenamigambi.
9) Inama y'Abaminisitiri yemeje ko u Rwanda rugirana umubano n'igihugu cya Estonia , ushingiye kuri za Ambasade.
10. Mu bindi :
- Minisitiri w'Imari n'Igenamigambi yamenyesheje Inama y'Abaminisitiri ko inama yahuje u Rwanda n'Abaterankunga yagenze neza ikagera no ku myanzuro ishimishije. Inama y'Abaminisitiri yabyishimiye, isaba Abaminisitiri gukurikirana ibyayivuyemo kugira ngo bishyirwe mu bikorwa.
- Minisitiri w'Uburezi, Ubumenyi, Ikorana buhanga n'Ubushakashatsi yamenyesheje Inama y'Abaminisitiri iby'ubutumwa yagiyemo mu Bwongereza bujyanye no guteza imbere ubumenyi n'ikoranabuhanga.
- Umunyamabanga wa Leta ushinzwe Amashuri Abanza n'Ayisumbuye muri Minisitiri y'Uburezi, Ubumenyi, Ikoranabuhanga n'Ubushakashatsi yamenyesheje Inama y'Abaminisitiri ko kuwa gatanu tariki ya 09/12/2005 hazaba umuhango wo gutaha ku mugaragaro inzu nshya Inama y'Igihugu ishinzwe ibizamini bya Leta izakoreramo.
- Umunyamabanga wa Leta ushinzwe Ingufu n'Itumanaho muri Minisiteri y'Ibikorwa Remezo yamenyesheje Inama y'Abaminisitiri ibyagezweho mu nama ya Nile Equatorial Lakes Subsidiary Action Program (NELSAP) n'ibiganiro yagiranye na Minisitiri w'Uburundi n'uwa Repubulika Iharanira Demokarasi ya Kongo bashinzwe Ingufu.
Kigali, kuwa 07/12/2005
Minisitiri
muri Primature ushinzwe Itangazamakuru