None kuwa gatatu tariki ya 08 Gashyantare 2006, Inama y'Abaminisitiri yateraniye muri Village Urugwiro, iyobowe na Nyakubahwa Perezida wa Repubulika, Paul KAGAME.
Imaze kwemeza gahunda y'inama, Inama y'Abaminisitiri yafashe ibyemezo bikurikira :
1. Kwemeza ibyemezo by'Inama y'Abaminisitiri Idasanzwe yo ku itariki ya 27/01/2006 imaze kubikorera ubugororangingo.
2. Inama y'Abaminisitiri yemeje umushinga w'itegeko ryo kwimura abantu kubera imirimo ifitiye Igihugu akamaro.
3. Inama y'Abaminisitiri yemeje Umugambi wa Kabiri w'Igihugu werekeye ibikorwa remezo by'ikoranabuhanga mu itumanaho n'itangazabumenyi/NICI Plan II.
4. Inama y'Abaminisitiri yemeje ko :
- Bwana Dong-Kye LEE aba Konsili w'Icyubahiro/Consul Honoraire/Honorary Consul w'u Rwanda muri Korea y'Amajyepfo ;
- Bwana Amos KAMUGISHA aba Konsili w'Icyubahiro/Consul Honoraire/Honorary Consul wa Korea y'Amajyepfo mu Rwanda.
5. Inama y'Abaminisitiri yemeje Iteka rya Perezida ryemerera kwemeza burundu amasezerano hagati ya Guverinoma y'u Rwanda na Guverinoma ya Repubulika ya Koreya ku byerekeye ubutwererane mu rwego rw'ubukungu, ubumenyi na tekiniki, yashyiriweho umukono i Seoul kuwa 26/10/2005.
6. Inama y'Abaminisitiri yahaye Minisitiri y'Ububanyi n'Amahanga n'Ubutwererane uburenganzira bwo gushyira umukono ku masezerano (Memorandum of Understanding-MoU) azagenga ubutwererane hagati ya Guverinoma y'u Rwanda n'Ubwongereza mu myaka 10 iri imbere.
7. Inama y'Abaminisitiri yemeje ko :
a) Bwana Pak Hyon ZAE ahagararira igihugu cye cya Repubulika Iharanira Demokarasi ya Korea ku rwego rwa Ambasaderi afite icyicaro i Kampala ;
b) Bwana Richard Tumusiime KABONERO ahagararira igihugu cye cya Uganda mu Rwanda.
8. Inama y'Abaminisitiri yemeje Iteka rya Minisitiri w'Intebe rigena inkunga ya Leta ifasha abakozi bayo kuva no kujya ku kazi imaze kurikorera ubugororangingo.
9. Inama y'Abaminisitiri yemeje :
a ) Iteka rya Minisitiri w'Intebe rihagarika by'agateganyo kubera ibura ry'umurimo n'irisezerera nta mpaka mu bakozi ba Leta, Bwana MUTAGANDA Aloys, wari umukozi mu Kigo cya OVIBAR ;
b) Iteka rya Minisitiri w'Intebe rishyira mu kiruhuko cy'izabukuru Madamu KANDAMA Marie Dative, wari umukozi wa MIJESPOC ;
c) Dosiye y'uwari Umunyamabanga Wihariye wa Minisitiri w'Abakozi ba Leta n'Umurimo, Madamazela NZAMWITA Lily, usaba guhagarika akazi ku mpamvu ze bwite.
10. Inama y'Abaminisitiri yemeje i teka rya Minisitiri rishyiraho amabwiriza agenga imyifatire y'abantu bagira uruhare mu gikorwa cy'amatora.
11. Inama y'Abaminisitiri yemeje iteka rya Minisitiri rigena uburyo Komite Nyobozi z'Inama y'Igihugu y'Abagore zihuzwa ku rwego rw'Utugari.
12. Inama y'Abaminisitiri yashyize by'agateganyo ku mwanya w'ubuyobozi bukuru bwa CAMERWA, Bwana NKURUNZIZA Gustave, asimbura Bwana RWAGASANA Ernest. Yagejejweho ko Inama y'Ubutegetsi y'icyo kigo yihaye amafaranga ku buryo bunyuranyije n'amategeko, isaba ko iseswa.
13. Mu bindi:
- Inama y'Abaminisitiri yashyigikiye umushinga wo gufungurira abanyeshuri bo mu mashuri yisumbuye konti mu mabanki, mu rwego rwo kubatoza umuco mwiza wo kuzigama.
- Inama y'Abaminisitiri yagejejweho inyandiko yerekana uko CDF-Gahunda za PDL-HIMO-Ubudehe bikora, irabishima.
- Minisitiri w'Ubutegetsi bw'Igihugu, Imiyoborere Myiza, Amajyambere Rusange n'Imibereho Myiza y'Abaturage yagejeje ku Nama y'Abaminisitiri uko amatora ku rwego rw'Utugari yagenze neza muri rusange, ayisezeranya kuzayigezaho raporo irambuye.
- Minisitiri w'Imari n'Igenamigambi yagejeje ku Nama y'Abaminisitiri raporo igaragaza ko inama ku ngamba z'iterambere ry'ubukungu rigamije kurwanya ubukene (EDPRS) yagenze neza.
- Minisitiri w'Ubutabera yamenyesheje Inama y'Abaminisitiri ko u Rwanda rwatsinze Repubulika Iharanira Demokarasi ya Kongo mu rubanza yari yarureze ibikorwa bya gisirikare ku butaka bwayo (cases of armed activities/cas d'activités armées).
- Minisitiri w'Ubuhinzi n'Ubworozi yamenyesheje Inama y'Abaminisitiri ko indwara y'ubutaka yari yabonetse mu Karere ka Nyaruguru yakumiriwe kubera ko urukingo rwo kuyirwanya rumaze kuboneka.
- Minisitiri w'Ubutaka, Ibidukikije, Amashyamba, Amazi na Mine yamenyesheje Inama y'Abaminisitiri ko ikimpoteri cy'i Nyanza (Kicukiro) cyahiye biturutse kuri gaz irimo, ariko ko Umujyi wa Kigali washyizeho gahunda yo kukibuza kongera kwaka.
- Umunyamabanga wa Leta ushinzwe Ubutwererane muri Minisiteri y'Ububanyi n'Amahanga n'Ubutwererane yamenyesheje Inama y'Abaminisitiri ko ku matariki ya 11-14/02/2006, hari abashyitsi bazagenderera u Rwanda, ari bo :
- Minister for Development Cooperation and Humanitarian Action wa Luxembourg , Mr. Jean Louis Schiltz ;
- UNICEF Executive Director, Ann Veneman ;
- UNAIDS Executive Director, Peter Piot ;
- Permanent Secretary of the United Kingdom Department for International Development, Sir Suma Chakrabarti.
Kigali, kuwa 08/02/2006
Minisitiri
muri Primature ushinzwe Itangazamakuru