ITANGAZO  RY’IBYEMEZO BY'INAMA Y'ABAMINISITIRI  YO KU ITARIKI  YA 09 KAMENA   2005

---

None kuwa kane tariki ya 09/06/2005, Inama y'Abaminisitiri Idasanzwe yateraniye muri Village Urugwiro, iyobowe na Nyakubahwa Perezida wa Repubulika: Paul KAGAME.

Imaze kwemeza gahunda y'inama, Inama y'Abaminisitiri yafashe ibyemezo bikurikira:

1. Inama y'Abaminisitiri yemeje iteka rya Minisitiri rizamura mu ntera ba Su Ofisiye n'Abapolisi bato, ribashyira ku ipeti rya C-SGT (Chief Sergeant), SGT na CPL

Abapolisi 108 bafite ipeti rya SGT bazamuwe mu ntera ku ipeti rya C-SGT

Abapolisi 36 bo ku rwego rwa CPL bazamuwe mu ntera ku ipeti rya C-SGT

Abapolisi 14 bo ku rwego rwa PC bazamuwe mu ntera ku ipeti rya C-SGT

Abapolisi 40 bo ku rwego rwa CPL bazamuwe mu ntera ku ipeti rya SGT

Abapolisi 69 bo ku rwego rwa PC (Police Constable) bazamuwe mu ntera ku ipeti rya SGT

Abapolisi 688 bo ku rwego rwa PC bazamuwe mu ntera ku ipeti rya CPL

2. Inama y'Abaminisitiri yemeje iteka rya Minisitiri rigena amafaranga y'itangiramurimo muri Polisi y'Igihugu kuri ba Ofisiye n'abandi bapolisi batari ba Ofisiye.

3. Inama y'Abaminisitiri yongeye gusuzuma umushinga w'itegeko rirebana na tombola, isaba ko unonosorwa vuba.

4. Inama y'Abaminisitiri yashinze imirimo Abayobozi bakurikira :

a) Bwana NSENGIYUMVA Justin yagizwe Umunyamabanga Mukuru muri Minisiteri y'Ubucuruzi, Inganda, Guteza Imbere Ishoramari, Ubukerarugendo n'Amakoperative

b)  Madamu Mary BAINE yagizwe Komiseri Mukuru Wungirije wa Rwanda Revenue Authority, agakomeza no kuba Komiseri wa Gasutamo

c)  Inama y'Abaminisitiri yemeje Iteka rya Perezida rishyiraho Komiseri Mukuru wa Rwanda Revenue Authority : Bwana GAPERI KANYESIIME Henry

d)  Inama y'Abaminisitiri yemeje Iteka rya Perezida rishyiraho Umukuru w'Intara ya Butare : Bwana KABERA Erasto

5. Inama y'Abaminisitiri yashinze imirimo aba bakurikira muri Polisi y'Igihugu :

a)  ACP Stanley NSABIMANA yazamuwe ku ntera ya Commissioner of Police agirwa Komiseri Mukuru Wungirije ushinzwe Ubutegetsi n‘Abakozi.

b)  Capt Costa HABYARA yashyizwe muri Polisi y'Igihugu, ahabwa intera ya Chief Superintendent, agirwa Umuyobozi wa CID

c)  ACP Emmanuel BAYINGANA yagizwe Umuyobozi w'Ubutegetsi n'Abakozi

d)  Maj Jeannot RUHUNGA KIBEZI yashyizwe muri Polisi y'Igihugu, ahabwa intera ya Chief Superintendent, agirwa Umuyobozi wa Intelligence

6. Inama y'Abaminisitiri yagejejweho raporo y'agateganyo y'itsinda rya NEPAD rishinzwe kugenzura imiyoborere myiza (Report of African Peer Review Panel on the Country Review of the Republic of Rwanda), iyitangaho ibitekerezo.

7. Inama y'Abaminisitiri yemeje gahunda ya Minisiteri y'Ubutaka, Ibidukikije, Amashyamba, Amazi na Mine, ifatanyije n'amashami atandukanye y'Umuryango w'Abibumbye, igamije kubonera umuti ibibazo biterwa no kwangirika kw'igishanga cya Gikondo bitewe n'imirimo ihakorerwa kandi ibangamiye ubuzima bw'abantu ndetse n'ibidukikije ; yemeje kandi ishyirwaho ry'ikigo « Cleaner Production Centre ».

8. Inama y'Abaminisitiri yongeye kwibutsa ko

-  Ruswa igomba guhanwa ku buryo bw'intangarugero;

-  Abanyarwanda bagomba kwita ku isuku;

- Amashyamba agomba kurushaho kwitabwaho.

9. Mu bindi:

a) Minisitiri w'Intebe yagejeje ku Nama y'Abaminisitiri iby'urugendo avuyemo i Brazzaville aho yari ahagarariye Nyakubahwa Perezida wa Repubulika, mu Nama ya 12 y'Abakuru b'Ibihugu na za Guverinoma bigize Umuryango wa CEEAC/ECCAS

b) Minisitiri w'Umutekano mu Gihugu yagejeje ku Nama y'Abaminisitiri iby'impanuka ya bisi yabereye i Cyonyo mu gihugu cya Uganda hakitaba Imana abantu 34 mubari bayirimo.

Inama y'Abaminisitiri yababajwe n'iyo mpanuka yifatanya mu kababaro n'imiryango y'ababuze ababo.

 

Kigali, kuwa 09/06/2005.

Minisitiri muri Primature ushinzwe Itangazamakuru

Prof. NKUSI Laurent.