None kuwa gatanu tariki ya 09 Kamena 2006, Inama y'Abaminisitiri yateraniye muri Village Urugwiro, iyobowe na Nyakubahwa Perezida wa Repubulika, Paul KAGAME.
Imaze kwemeza gahunda y'inama, Inama y'Abaminisitiri yafashe ibyemezo bikurikira :
1. Inama y'Abaminisitiri yemeje ibyemezo by'Inama y'Abaminisitiri yo ku itariki ya 24/05/2006 imaze kubikorera ubugororangingo.
2. Inama y'Abaminisitiri yemeje imishinga y'amategeko yo muri MINAGRI ikurikira:
a) Umushinga w'itegeko rishyiraho uburyo bwo kwirinda no kurwanya indwara z'amatungo mu Rwanda;
b) Umushinga w'itegeko rishyiraho imitunganyirize y'uburobyi n'ubworozi bwo mu mazi mu Rwanda.
3. Inama y'Abaminisitiri yashyizeho ingamba zo gukumira indwara y'ibicurane by'ibiguruka /Rwanda National Plan for Avian Influenza Prevention and Control/Plan National pour la Prévention et le Contrôle de la Grippe Aviaire.
4. Inama y'Abaminisitiri yemeje umushinga w'itegeko rigenga ubucukuzi bw'amabuye y'agaciro na kariyeri
5. Inama y'Abaminisitiri yasuzumye ibirebana no kurangiza amasezerano y'imicungire ya CIMERWA (Management contract/Contrat de gestion) hagati ya Guverinoma y'u Rwanda na Sosiyete CBMC, ishyiraho itsinda ry'Abaminisitiri ryo kunononsora ayo masezerano no kwiga uko azashyirwa mu bikorwa.
6. Inama y'Abaminisitiri yahaye Bwana RUJUGIRO Tribert ikibanza cy'aho azubaka Sitade nshya i Nyanza
7. Inama y'Abaminisitiri yemeje amateka ya Minisitiri yo muri MINIJUST akurikira :
a) Iteka rya Minisitiri rigena amagarama y'urukiko mu manza z'imbonezamubano, iz'ubucuruzi, iz'umurimo n'iz'ubutegetsi.
b) Iteka rya Minisitiri rigena amagarama y'urukiko mu manza z'inshinjabyaha.
8. Inama y'Abaminisitiri yemeje raporo ya munani (8) y'u Rwanda kuri Komisiyo y'Afurika y'Uburenganzira bwa Muntu.
9. Inama y'Abaminisitiri yemeje amateka ya Minisitiri w'Intebe yo muri Minisiteri y'Ingabo akurikira:
a) Iteka rya Minisitiri w'Intebe rishyiraho Visi Perezida w'Urukiko rwa Gisirikare: Brigadier Général Steven KARYANGO
b) Iteka rya Minisitiri w'Intebe rishyiraho abacamanza mu Rukiko Rukuru rwa Gisirikare:
- Capt Déo RUSIZANA
- Lt Alphonse MUBIHAME
- S/Sgt SHINGIRO Victor
10. Inama y'Abaminisitiri yemeje amateka akurikira yo muri Minisiteri y'Umutekano mu Gihugu
a) Iteka rya Perezida ryirukana burundu ba Ofisiye babiri (2) ba Polisi y'Igihugu bo mu rwego rwisumbuye.
b) Iteka rya Minisitiri w'Intebe ryirukana burundu ba Ofisiye bato batandatu (6), ba Polisi y'Igihugu.
c) Iteka rya Minisitiri ryirukana burundu ba Su-Ofisiye umunani (8) n'abapolisi bato mirongo itatu n'umunani (38).
11. Inama y'Abaminisitiri yashyizeho abagize Inama Nkuru
y'Itangazamakuru:
- NAHAYO Charles
- Padiri KAREKEZI Dominique
- KABUYE David
- BAHATI Prince
- Dr. NYABYENDA Laurien
- Dr. KARAMBIZI Vénuste
- MPAMBARA Inès
- UWIMANA Addolorata Gabrielle
- RUBONEKA Thaïs
12. Inama y'Abaminisitiri yashyizeho abasimbura abavuye mu Nama y'Igihugu ishinzwe Impunzi:
- IP MUHISONI Rose
- TWAGIRAYEZU François
- RUGANZA NDASUMBA Abdias
- KAGOYIRE Alice
- KAMPAYANA Augustin
13. Inama y'Abaminisitiri yemeje abahagararira ibihugu byabo mu Rwanda ku buryo bukurikira :
- Madamu Bjorg S. LEITE ahagararira igihugu cye cya Norvège/Norway mu Rwanda nka Ambasaderi ufite icyicaro i Kampala;
- Bwana Serge KARONKANO ahagararira igihugu cye cy'Uburundi mu Rwanda nka Ambasaderi.
- Bwana MARTIN Georges ahagararira igihugu cye cy'Ubusuwisi mu Rwanda nka Ambasaderi ufite icyicaro i Nairobi.
- Madamu MENDOZA Jacqueline ahagararira igihugu cye cya Venezuela mu Rwanda nka Ambasaderi ufite icyicaro i Nairobi.
- Bwana SELWYN VIJAYARAJAN Das ahagararira igihugu cye cya Malaysia mu Rwanda nka Ambasaderi ufite icyicaro i Nairobi.
14. Inama y'Abaminisitiri yashyize abayobozi mu myanya ku buryo bukurikira :
- Umunyamanga wihariye w'Umunyamabanga wa Leta ushinzwe Inganda no Guteza Imbere Ishoramari muri MINICOM: Alain MUTESI MANIRAGUHA;
- Umunyamabanga Uhoraho muri MINAGRI : Dr. KALIBATA Agnes;
- Umunyamabanga Uhoraho muri MINISANTE: KAYONGA Caroline;
- Umunyamabanga Mukuru wungirije muri NSS ushinzwe iperereza ryo hanze y'Igihugu: Lt Col. Joseph NZABAMWITA;
- Umuhuzabikorwa w'Agateganyo wa RSSP: MUKESHIMANA Géraldine;
- Umuyobozi ushinzwe Televiziyo muri ORINFOR: KIJE MUGISHA;
15. Mu bindi:
- Nyakubahwa Perezida wa Repubulika yagejeje ku Nama y'Abaminisitiri iby'urugendo avuyemo muri Leta Zunze Ubumwe za Amerika aho yari yagiye ku butumire bwa Mugenzi we Nyakubahwa Perezida George W. BUSH asaba Abaminisitiri buri wese ku bimureba, gukurikirana imyanzuro y'ingirakamaro yagezweho.
- Minisitiri muri Primature ushinzwe Iterambere ry'Umuryango n'iry'Uburinganire yamenyesheje Inama y'Abaminisitiri ko ku itariki ya 16/06/2006 ari umunsi w'umwana w'umunyafurika.
- Minisitiri w'Ubutegetsi bw'Igihugu, Imiyoborere Myiza, Amajyambere Rusange n'Imibereho Myiza y'Abaturage yamenyesheje Inama y'Abaminisitiri ko:
- Kuva ku itariki ya 19 kugeza ku ya 22/06/2006 i Kigali hari inama y'ihuriro ry'amadini .
- Kuva ku itariki ya 06 kugeza ku ya 09/09/2006 hari inama izahuza u Rwanda na Rhénanie Palatinat.
- Minisitiri w'Ubutaka, Ibidukikije, Amashyamba, Amazi na Mine yagejeje ku Nama y'Abaminisitiri raporo y'urugendo avuyemo muri Congo-Brazzaville.
Kigali, kuwa 09/06/2006
Minisitiri
muri Primature ushinzwe Itangazamakuru