None kuwa gatatu tariki ya 12 Ukwakira 2005, Inama y'Abaminisitiri yateraniye muri Village Urugwiro, iyobowe na Nyakubahwa Perezida wa Repubulika : Paul KAGAME.
Imaze kwemeza gahunda y'inama, Inama y'Abaminisitiri yafashe ibyemezo bikurikira :
1. Inama y'Abaminisitiri yemeje ibyemezo by'Inama y'Abaminisitiri byo ku itariki ya 30/09/2005 imaze kubikorera ubugororangingo.
2. Inama y'Abaminisitiri yemeje :
- Umushinga w'Itegeko Ngenga rishyiraho kandi rigena imitunganyirize n'imikorere bya Komisiyo y'Igihugu ishinzwe kurwanya SIDA (CNLS).
- Umushinga w'Itegeko rishyiraho kandi rigena imitunganyirize n'imikorere y'Ikigo gishinzwe Ubuvuzi n'Ubushakashatsi kuri SIDA, Malariya, Igituntu n'izindi ndwara z'ibyorezo (TRAC plus).
- Umushinga w'Itegeko rishyiraho kandi rigena imitunganyirize n'imikorere y'ikigo cy'Igihugu cy'urwitegererezo mu by'ubuvuzi/National Reference Laboratory/Laboratoire National de Référence (LNR).
- Umushinga w'Itegeko rishyiraho kandi rigena imitunganyirize n'imikorere y'Ikigo cy'Igihugu gishinzwe kwakira no gutanga Amaraso/National Center for Blood Transfusion/ Centre National de Transfusion Sanguine (CNTS).
3. Inama y'Abaminisitiri yemeje ishyirwaho rya Komite ishinzwe imikoranire hagati ya Minisiteri y'Ubuzima na Minisiteri y'Ingabo mu rwego rw'Ubuvuzi.
4. Inama y'Abaminisitiri yemeje ishyirwaho ry'ikigega cyo guteza imbere abakozi bo mu buvuzi (health basket fund/basket fund pour les ressources humaines en santé).
5. Inama y'Abaminisitiri yemeje Umushinga w'Itegeko rishyiraho Urugaga rw'Abavoka.
6. Inama y'Abaminisitiri yemeje Iteka rya Perezida risesa Inama Njyanama y'Akarere ka Mugombwa.
7. Inama y'Abaminisitiri yemeje Iteka rya Perezida rishyiraho Abayobozi b'agateganyo bahagarariye Perezida wa Repubulika mu Karere ka Mugombwa mu Ntara ya Butare guhera tariki ya 12/10/2005, mu gihe hataratorwa abandi. Abo ni Bwana NSENGIMANA Cyprien wungirijwe na Bwana KAYIRANGA MUZUKA Eugène.
8. Inama y'Abaminisitiri yemeje Iteka rya Perezida ryongerera igihe cy'amezi atandatu Komisiyo y'Igihugu yigenga ishinzwe kwegeranya ibimenyetso bigaragaza uruhare rwa Leta y'Ubufaransa muri jenoside yabaye mu Rwanda.
9. Inama y'Abaminisitiri yagejejweho raporo y'uko ubucukuzi bw'amabuye y'agaciro buhagaze mu Rwanda.
10. Mu bindi
- Minisitiri w'Ubutaka, Ibidukikije, Amashyamba, Amazi na Mine yamenyesheje Inama y'Abaminisitiri ko ku itariki ya 14/11/2005 ari umunsi wo gutera ibiti n'amashyamba mu Rwanda hose. Insanganyamatsiko y'uwo munsi ni : « Dutere ibiti byinshi kandi tubikurikirane ».
- Minisitiri w'Urubyiruko, Umuco na Siporo yamenyesheje Inama y'Abaminisitiri ko ku itariki ya 14/10/2005 hari inama izahuza Minisiteri ayobora n'abikorera ku giti cyabo, igamije guteza imbere imikino mu Rwanda.
- Minisitiri w'Ubucuruzi, Inganda, Guteza imbere ishoramari, Ubukerarugendo n'Amakoperative yamenyesheje Inama y'Abaminisitiri iby'urugendo avuyemo i Genève mu Busuwisi, mu nama y'Umuryango Mpuzamahanga w'Ubucuruzi (WTO/OMC).
- Minisitiri w'Abakozi ba Leta n'Umurimo yamenyesheje Inama y'Abaminisitiri ibya gahunda ya TOKTEN (Transfer of knowledge and technical know - how) Minisiteri ayobora izakorana na UNDP/PNUD mu byo korohereza abanyarwanda bafite ubumenyi n'ubuzobere mu mirimo ikenewe mu gihugu, baba muri Amerika y'Amajyaruguru, Aziya na Afurika kuza mu Rwanda gukora cyangwa gushora imari.
- Umunyamabanga wa Leta ushinzwe Kurwanya SIDA n'izindi Ndwara z'Ibyorezo muri Minisiteri y'Ubuzima yamenyesheje Inama y'Abaminisitiri aho Ikigega cya Saudi Arabia (Saudi Fund) kigeze giteza imbere Ibitaro byitiriwe Umwami Fayçal.
Kigali, kuwa 12/10/2005
Minisitiri
muri Primature ushinzwe Itangazamakuru