None ku wa gatatu tariki ya 13 Ukwakira
2004, Inama y’Abaminisitiri yateraniye muri Village Urugwiro, iyobowe
na Nyakubahwa Perezida wa Repubulika: Paul KAGAME.
Nyakubahwa
Perezida wa Repubulika yatangije inama aha ikaze Abaminisitiri
n’Abanyamabanga ba Leta baherutse kwinjira muri Guverinoma.
Yibukije
Abagize Guverinoma bose uburemere bw’inshingano zabo, abasaba gukorana
umurava akazi bashinzwe, gukorera hamwe bagamije guharanira icyateza
imbere Abanyarwanda.
Yabasabye
gukora ibishoboka byose kugira ngo intego zikubiye mu cyerekezo cya
2020 (vision 2020) zizagerweho.
Imaze
kwemeza ibyari ku murongo w'ibyigwa, Inama y'Abaminisitiri yafashe
ibyemezo bikurikira:
1.
Inama y’Abaminisitiri yemeje imyanzuro y’ibyemezo by’Inama
y’Abaminisitiri yo ku itariki ya 28/09/2004, imaze kuyikorera
ubugororangingo.
2.
Inama y’Abaminisitiri yemeje imishinga y’amategeko yemerera
kwemeza burundu :
- amasezerano
y’inguzanyo yashyiriweho umukono i Karthoum kuwa 28/09/2002 hagati ya
Repubulika y’u Rwanda na BADEA yerekeranye n’inguzanyo ingana na
5.000.000 USD agenewe umushinga wo gusana ingomero 3 z’amashanyarazi
(Mukungwa, Gihira na Gisenyi) ;
-
amasezerano y’inguzanyo yashyiriweho umukono i Cairo ku itariki
ya mbere Nyakanga 2004 hagati ya Repubulika y’u Rwanda na BADEA
yerekeranye n’inguzanyo y’inyongera ingana na 2.000.000 USD agenewe
umushinga wo gusana ingomero 3 z’amashanyarazi (Mukungwa, Gihira na
Gisenyi) ;
-
amasezerano y’inguzanyo yashyiriweho umukono i Vienna kuwa
04/02/2003, hagati ya Repubulika y’u Rwanda na OPEC yerekeranye
n’inguzanyo ingana na 3.000.000 USD y’umushinga wo gusana ingomero 3
z’amashanyarazi (Mukungwa, Gihira na
Gisenyi) ;
-
amasezerano y’inguzanyo n°3955-RW yashyiriweho umukono i
Washington D.C kuwa 03/08/2004 hagati ya Repubulika y’u Rwanda na IDA
yerekeranye n’inguzanyo ingana na 13.700.000 DTS agenewe umushinga wo
kongerera ubushobozi inzego za Leta.
3.
Inama y’Abaminisitiri yemeje umushinga w’itegeko risesa Ikigega
cya Leta cyihariye cy’ingwate/Liquidation du Fonds Spécial de
Garantie/Special Guarantee Fund.
4.
Inama y’Abaminisitiri yemeje inyandiko yerekeranye n’igikorwa
kijyanye no gutangiza umwaka wa
2005 wagizwe umwaka mpuzamahanga w’inguzanyo ziciriritse, u
Rwanda ruzatangiza icyo gikorwa ku itariki ya
02/11/2004.
5.
Inama y’Abaminisitiri yemeje ko :
a) Bwana
David MACRAE ahagararira «Union Européenne/European Union» mu Rwanda,
afite icyicaro i Kigali.
b) Bwana
Satoru MIYAMURA ahagararira igihugu cye cy’Ubuyapani mu Rwanda ku
rwego rwa Ambasaderi, afite icyicaro i Nairobi muri Kenya.
6.
Inama y’Abaminisitiri yemeje iteka rya Minisitiri w’Intebe
rikura ku mirimo Bwana
GAFUNZI Justin, kubera amakosa yakoze mu
kazi.
7. Inama
y’Abaminisitiri yemeje iteka rya Perezida ryemerera Colonel Joseph
KAREMERA guhagarika umurimo nk’umusirikare mu Ngabo z’Igihugu kubera
ko bitabangikana n’indi mirimo yashinzwe.
8.
Inama y’Abaminisitiri yashyizeho abagize Inama y’Ubutegetsi ya
«Rwandair Express» ku buryo bukurikira :
-
Bwana BAYIGAMBA Robert,
perezida;
- Bwana
MUJONI Fred;
- Bwana
HATEGEKA Emmanuel;
- Bwana
MUGENZI Peter;
- Bwana
NSENGIYUMVA Justin.
9.
Inama y’Abaminisitiri yemeje ko hazajya haba umuganda buri wa
gatanu wa mbere w’ukwezi, uzajya ukorerwa mu Tugari, ariko wateguriwe
ku Mirenge; bitabujije ko inzego z’ibanze zishobora gutegura indi
miganda ijyanye n’ibyifuzo byabo.
10. Mu
bindi:
a) Minisitiri w’Ububanyi n’Amahanga
n’Ubutwererane yamenyesheje Inama y’Abaminisitiri ko Dr. RWAMASIRABO
Emile yemerewe guhagararira u Rwanda i Tokyo mu gihugu cy’Ubuyapani ku
rwego rwa Ambasaderi.
b) Minisitiri w’Ubuhinzi n’Ubworozi
yamenyesheje Inama y’Abaminisitiri ko ku itariki ya 16 Ukwakira ari
umunsi w’ibiribwa ku Isi.