None kuwa gatatu tariki ya 13 Nyakanga 2005, Inama y'Abaminisitiri yateraniye muri Village Urugwiro, iyobowe na Nyakubahwa Perezida wa Repubulika: Paul KAGAME.
Imaze kwemeza gahunda y'inama, Inama y'Abaminisitiri yafashe ibyemezo bikurikira:
1. Inama y'Abaminisitiri yemeje ibyemezo by'Inama y'Abaminisitiri yo ku matariki 22/06/2005 na 29/06/2005 imaze kubikorera ubugororangingo.
2. Inama y'Abaminisitiri yemeje umushinga w'itegeko ryuzuza kandi rihindura itegeko n° 41/2004 ryo kuwa 30/12/2004 rishyiraho imari ya Leta y'umwaka wa 2005 (revised budget/budget révisé).
3. Inama y'Abaminisitiri yatanze ibitekerezo ku mushinga wo kubaka amacumbi y'abanyeshuri bo muri Kaminuza no mu mashuri makuru ku bufatanye n'abikorera ku giti cyabo, isaba Minisitiri w'Uburezi, Ubumenyi, Ikoranabuhanga n'Ubushakashatsi gukomeza imishyikirano n'abikorera ku giti cyabo kugira ngo uwo mushinga ushyirwe mu bikorwa.
4. Inama y'Abaminisitiri yagejejweho raporo ku migendekere y'umushinga wo gutunganya ahantu hateganyijwe ibikorwa by'ubuhahirane busonewe/Free Economic and Export Processing Zone/Zone de Libre Echange et de Promotion des Exportations.
5. Inama y'Abaminisitiri yagejejweho raporo ku mushinga w'irushanwa n'iterambere ry'amasosiyete (Competitiveness and Entreprise Development Project/Projet de Compétitivité et de Développement de l'Entreprise) yemeza ingamba zafatwa kugira ngo uwo mushinga ukore neza.
6. Inama y'Abaminisitiri yashinze imirimo Abayobozi bakurikira :
- Col Frank MUSHYO KAMANZI: Umujyanama wa Nyakubahwa Perezida wa Repubulika mu by'umutekano no kurengera Igihugu ;
- MANZI KAYIHURA: Umuyobozi wa Rwandair Express.
7. Mu bindi:
a ) Umunyamabanga wa Leta muri Minisiteri y'Ubutaka, Ibidukikije, Amashyamba, Amazi na Mine ushinzwe Amazi na Mine yamenyesheje Inama y'Abaminisitiri imiterere y'ibura ry'amazi mu Mujyi wa Kigali muri iki gihe.
Inama y'Abaminisitiri irasaba abatuye uwo Mujyi gukoresha amazi bayarondereza.
b) Umunyamabanga wa Leta muri Minisiteri y'Ibikorwa Remezo ushinzwe Ingufu n'Itumanaho yamenyesheje Inama y'Abaminisitiri ibyagezweho muri gahunda ya mbere yo guteza imbere ikoranabuhanga mu itumanaho (NICI PLAN) mu gihe cy'imyaka itanu ishize n'ibizitabwaho muri gahunda yayo ya kabiri 2006-2010.
c) Umunyamabanga wa Leta muri Minisiteri y'Ubutaka, Ibidukikije, Amashyamba, Amazi na Mine ushinzwe Ubutaka n'Ibidukikije yamenyesheje Inama y'Abaminisitiri ko hari imishinga ibiri Global Environment Facility (GEF) izateramo inkunga u Rwanda muri gahunda yarwo yo kubungabunga ibishanga byangiritse ( integrated management of critical ecosystems/gestion intégrée d'écosystèmes fragiles) no kubungabunga amashyamba yo mu misozi.
d) Umunyamabanga wa Leta muri Minisiteri y'Imari n'Igenamigambi ushinzwe Igenamigambi yamenyesheje Inama y'Abaminisitiri ko hari umushoramari wikorera ku giti cye wifuza kugura uruganda rw'icyayi rwa Mulindi.
Kigali, kuwa 13/07/2005.
Minisitiri
muri Primature ushinzwe Itangazamakuru