None kuwa gatatu tariki ya 15 Werurwe 2006, Inama y'Abaminisitiri yateraniye muri Village Urugwiro, iyobowe na Nyakubahwa Perezida wa Repubulika, Paul KAGAME.
Imaze kwemeza gahunda y'inama, Inama y'Abaminisitiri yafashe ibyemezo bikurikira :
1. Inama y'Abaminisitiri yemeje ibyemezo by'Inama y'Abaminisitiri yo ku itariki ya 01/03/2006.
2. Inama y'Abaminisitiri yemeje politiki zikurikira : iy'ubucuruzi, iy'inganda, iy'ubukerarugendo, iy'ubukorikori n'iy'amakoperative.
3. Inama y'Abaminisitiri yemeje imishinga y'amategeko ikurikira :
- Umushinga w'itegeko ryerekeye kurengera umutungo bwite mu by'ubwenge/Draft Law on the Protection of Intellectual Property/Projet de Loi portant Protection de la Propriété Intellectuelle.
- Umushinga w'itegeko rishyiraho “Rwanda Registration Services Agency”.
- Umushinga w'itegeko rigenga imiterere n'imikorere y'amakoperative.
- Umushinga w'itegeko rishyiraho Ikigo gishinzwe guteza imbere amakoperative.
4. Inama y'Abaminisitiri yagejejweho “ Progress report » kuri « Free Trade Zone », isaba ko imirimo yo kuyitangiza yihutishwa.
5. Inama y'Abaminisitiri yemeje Strategic Plan/Plan Stratégique 2006-2010 y'Ibitaro byitiriwe Umwami Fayçal.
6. Inama y'Abaminisitiri yemeje iteka rya Minisitiri w'Intebe rishyiraho abashinjacyaha bafite ububasha mu Gihugu hose. Abo ni:
- RUBERWA Bonaventure;
- NTETE Jules Marius.
7. Inama y'Abaminisitiri yashyizeho abagize “Task Force” ku ruhande rw'u Rwanda yo gukurikirana ishyirwa mu bikorwa ku iyimurwa ry'amadosiye n'isozwa ry'imirimo y'Urukiko Mpuzamahanga Mpanabyaha ku Rwanda (ICTR/TPIR). Abo ni :
- NGOGA Martin, perezida;
- MUTABINGWA Aloys;
- MUTEZINTARE Daniel;
- MUDAHERANWA Alex;
- BATSINDA Aline.
8. Inama y'Abaminisitiri yamenyeshejwe aho imyiteguro y'icyumweru cyo kwibuka jenoside ku nshuro ya 12 igeze. Yemeje ko imihango y'uwo munsi izabera mu Karere ka Nyamasheke, Intara y'Uburengerazuba. Insanganyamatsiko ni: Twibuke jenoside twitabira Inkiko Gacaca kandi tugira ubutwari bwo kuvugisha ukuri no guhangana n'ingaruka zayo .
9. Inama y'Abaminisitiri yashyizeho abagize “Task Force” ya « Teacher Service Commission ». Abo ni:
- RUBAGUMYA FURAHA Emma, Umunyamabanga Nshingwabikorwa;
- NTAGARAMBA Johnson, ushinzwe “Management & Staffing Department”;
- KAYONGA Célestin, ushinzwe “Training & Development Department”;
- SENGATI UWASENGA Diane, ushinzwe ICT.
10. Inama y'Abaminisitiri yemeje ko :
a) Bwana Umberto PLAYA ahagararira igihugu cye cy'Ubutaliyani mu Rwanda ku rwego rwa Ambasaderi, ufite icyicaro i Kampala;
b) Bwana Royson MUKWENA ahagararira igihugu cye cya Zambia mu Rwanda ku rwego rwa Ambasaderi, ufite icyicaro i Dar es Salaam;
c) Bwana J.P RAKOTOARIVONY ahagararira igihugu cye cya Madagascar mu Rwanda ku rwego rwa Ambasaderi, ufite icyicaro Addis-Ababa;
d) Bwana Yaacov AMITAI ahagararira igihugu cye cya Israel mu Rwanda ku rwego rwa Ambasaderi.
11. Inama y'Abaminisitiri yashyize abayobozi mu myanya ku buryo bukurikira:
a) MUKANKUSI Charlotte, Umunyamabanga Mukuru muri Minisiteri y'Abakozi ba Leta n'Umurimo;
b) UWONKUNDA Claudette, Umunyamabanga Wihariye wa Nyakubahwa Perezida wa Sena;
c) NTAGANDA Gervais, Umuyobozi wa Banki y'Imiturire/Housing Bank/Banque de l'Habitat;
d) HAKIZIMANA Patrice, Umuyobozi wa « Task Force” ya RADA;
e) UWIMANA Pierre Claver, Umuyobozi Mukuru Wungirije wa RIEPA ushinzwe guteza imbere ibicuruzwa byoherezwa mu mahanga;
12. Inama y'Abaminisitiri yasabye ko Bwana HAKIZABERA Pipien aba Umuyobozi wa CAPMER.
13. Inama y'Abaminisitiri yongereye manda abagize Komisiyo y'Igihugu y'Uburenganzira bwa Muntu. Abo ni:
- KAYITESI Zayinabo Sylvie, perezida;
- KAYUMBA Déogratias, visi perezida;
- NKONGOLI Laurent;
- KANYANGE Anne Marie;
- NIYONZIMA Etienne;
- KAREMERA Pierre .
Inama y'Abaminisitiri yashyizeho kandi undi Mukomiseri muri iyo Komisiyo, Madamu TUMUKUNDE Hope, uzemezwa na Sena.
14. Mu bindi:
- Inama y'Abaminisitiri yasabye ko abanyeshuri batozwa umuco mwiza wo kubahana, wo kubaha abo bahura na bo, wo kugira isuku no kwimenyereza imirimo y'amaboko kuva bakiri bato.
- Minisitiri w'Ububanyi n'Amahanga n'Ubutwererane yamenyesheje Inama y'Abaminisitiri ko ku matariki ya 23-24/03/2006 Nyakubahwa Perezida wa Leta Yunze Ubumwe ya Tanzaniya azagenderera u Rwanda ku mugaragaro.
- Minisitiri w'Ubucuruzi, Inganda, Guteza Imbere Ishoramari, Ubukerarugendo n'Amakoperative yamenyesheje Inama y'Abaminisitiri iby'urugendo avuyemo mu Budage, aho yari ayoboye intumwa z'u Rwanda mu imurikagurisha mpuzamahanga, zikegukana umwanya wa kabiri ku mugabane wa Afurika.
Yayimenyesheje kandi iby'inama izahuza, ku rwego rw'Abaminisitiri bahagarariye ibihugu bigize imiryango ya EAC-SADC-COMESA, n'Umuryango w'Uburayi Bwunze Ubumwe. Iyo nama izabera i Kigali kuwa kane tariki ya 16/03/2006.
Yanayibukike ko kuri iyo tariki ya 16/03/2006, hari inama ya kabiri ya National Dialogue on Investment and Export Promotion.
- Minisitiri w'Urubyiruko, Umuco na Siporo yamenyesheje Inama y'Abaminisitiri ko kuwa gatandatu tariki ya 18/03/2006, ikipi APR izakina na FAR yo muri Maroc. Naho ku cyumweru tariki ya 19/03/2006, ikipi ALEXANDRIA yo muri Egypte izakina na RAYON SPORT.
- Minisitiri w'Ubutabera yamenyesheje Inama y'Abaminisitiri ko ku itariki ya 21/03/2006 ari Umunsi Mpuzamahanga wo Kurwanya Ivanguramoko.
- Minisitiri w'Ubuhinzi n'Ubworozi yamenyesheje Inama y'Abaminisitiri ko ku matariki ya 20-23/03/2006, i Kigali hazaba inama ya mbere izahuza u Rwanda , Tanzaniya , Uganda n'Uburundi, irebana n'umushinga wa “Pan African Tsetse and Trypanomiasis Eradication Campaign (PATTEC)”, ugamije gutsemba isazi ya Tsetse mu bihugu bigize Umuryango wa Afurika Yunze Ubumwe.
- Umunyamabanga wa Leta ushinzwe Ubuhinzi muri MINAGRI yamenyesheje Inama y'Abaminisitiri ko uburima bw'ibinyampeke (army worms/chenilles legionnaires) bwateye mu Turere tumwe tw'u Rwanda (Rusizi, Gisagara, Bugesera na Kirehe), aho burya amababi y'ibinyampeke (umuceri, ibigori, amasaka). Yanayimenyesheje ingamba zafashwe zo kuburwanya.
- Umunyamabanga wa Leta ushinze Igenamigambi muri MINECOFIN yamenyesheje Inama y'Abaminisitiri ko imishyikirano u Rwanda rwagiranye n'Ikigega Mpuzamahanga cy'Imari kuri gahunda y'iterambere ry'ubukungu no kurwanya ubukene yagenze neza.
- Umunyamabanga wa Leta ushinzwe Amazi na Mine muri MINITERE yamenyesheje Inama y'Abaminisitiri ko ku itariki ya 23/03/2006, ari umunsi w'amazi ku isi hose. Yanayimenyesheje kandi ko ku itariki ya 06/04/2006, i Kigali hazabera inama yo gutangiza imishinga yo mu bibaya 3 by'ibihugu bihuriye kuri Nil y'Amajyepfo.
- Umunyamabanga wa Leta ushinzwe Amajyambere Rusange n'Imibereho Myiza y'Abaturage muri MINALOC yagejeje ku Nama y'Abaminisitiri imbonerahamwe y'imigendekere y'amatora y'abayobozi b'inzego z'ibanze yabaye muri Mutarama-Werurwe 2006. Muri rusange amatora yagenze neza, yitabiriwe ku kigereranyo cya 95% kandi abagore begukanye 40,2 % y'imyanya yatorewe.
Kigali, kuwa 15/03/2006
Minisitiri
muri Primature ushinzwe Itangazamakuru