Ku
wa gatatu tariki ya 17 Ugushyingo 2004, Inama y’Abaminisitiri
yateraniye muri Village Urugwiro, iyobowe na Nyakubahwa Perezida wa
Repubulika: Paul KAGAME.
Imaze
kwemeza gahunda y’inama, Inama y'Abaminisitiri yafashe ibyemezo
bikurikira:
1.
Inama y’Abaminisitiri yemeje ibyemezo by’Inama y’Abaminisitiri
yo ku itariki ya 10/11/2004, imaze kubikorera
ubugororangingo.
2.
Inama y’Abaminisitiri yemeje umushinga w’itegeko rigena imari
ya Leta y’umwaka wa 2005.
3.
Inama
y’Abaminisitiri yemeje imishinga y’amategeko
ikurikira :
- umushinga w’itegeko ryemerera kwemeza
burundu amasezerano y’inguzanyo yashyiriweho umukono i Kigali mu
Rwanda kuwa 01/11/2004 hagati ya Repubulika y’u Rwanda n’Ikigega cya
SAUDI-ARABIYA Gitsura Amajyambere, yerekeranye n’inguzanyo ingana na
Miliyoni mirongo ine n’eshanu za «Riyals Saoudiens» (45.000.000 Riyals
Saoudiens), angana na miliyoni cumi n’ebyiri z’amadolari
y’amanyamerika (12.000.000 US$), agenewe umushinga wo gusana no
kwagura Ibitaro Byitiriwe Umwami Fayçal.
-
umushinga
w’itegeko ryemerera kwemeza amasezerano y’amafaranga angana na
miliyoni mirongo itandatu n’eshanu z’amadolari y’amanyamerika
(65.000.000 US$), arimo
miliyoni cumi n’eshanu (15.000.000 US$) z’inguzanyo na miliyoni
mirongo itanu (50.000.000 US$) z’impano, Ikigega Mpuzamahanga
cy’Iterambere/Association International de Développement/
International Development Association (IDA) cyageneye u Rwanda, yo
kurufasha
gushyira mu bikorwa gahunda yarwo yo kurwanya
ubukene.
4. Inama
y’Abaminisitiri yemeje umushinga w’itegeko rishyiraho kandi
ritunganya imikino y’urusimbi, tombola n’amarushanwa yo kuvuga
ibizaba/Draft Law on the establishment of the regulations relating to
the money games, lottery and gambling/Projet de loi fixant les règles
relatives aux jeux d’argent, loterie et concours de pronostic.
5.
Inama y’Abaminisitiri yemeje politiki y’ingufu.
Yunguranye
kandi ibitekerezo ku nyongera-kiguzi ku mashanyarazi aturuka kuri
mazutu ikoreshwa na moteri zitanga ingufu z’amashanyarazi/mécanisme de
répercussion intégrale du
coût de carburant sur le coût du KWh vendu/ Fuel Cost Pass Through
(FCPT), Inama y’Abaminisitiri yasabye ko binononsorwa hakazafatwa
umwanzuro mu nama yayo itaha.
6.
Mu bindi:
a) Minisitiri
w’Ubuhinzi n’Ubworozi yamenyesheje Inama y’Abaminisitiri ko Minisiteri y’Ubuhinzi
n’Ubworozi yemereye aborozi b’abanyarwanda kuvana mu bihugu bidukikije
bya Uganda na Tanzaniya inka zo korora, kugira ngo ibyo bishoboke
hashyizweho amabwiriza agomba gukurikizwa.
b) Minisitiri w’Ubucuruzi, Inganda,
Guteza Imbere Ishoramari, Ubukerarugendo n’Amakoperative yamenyesheje
Inama y’Abaminisitiri iby’urugendo yagiyemo muri Kenya aho yari
ayoboye intumwa z’aborozi bo mu Mutara bari bagiye kureba ibyiza byo
gukorera hamwe mu makoperative. Izo ntumwa zakiriwe na Nyakubahwa
Perezida wa Kenya Mwai Kibaki azigabira n’inka
120.
c) Minisitiri w’Ubutegetsi bw’Igihugu,
Imiyoborere Myiza, Amajyambere Rusange n’Imibereho Myiza y’Abaturage
yamenyesheje Inama y’Abaminisitiri ko yatumije muri Afurika y’Epfo
imashini zibumba amatafari yubakishwa atagombye gutwikwa, ibyo
bikazafasha mu rwego rwo kurengera ibidukikije.
d) Minisitiri
w’Urubyiruko, Umuco na Siporo yamenyesheje Inama y’Abaminisitiri
iby’urugendo aherutsemo i Gand, mu Bubiligi, aho yari ayoboye intumwa
z’ishyirahamwe ry’abagore bo mu Ntara ya Kibungo bari bajyanye imitako
yabo mu imurikagurisha.