None ku wa gatatu tariki ya 20 Ukwakira
2004, Inama y’Abaminisitiri yateraniye muri Village Urugwiro, iyobowe
na Nyakubahwa Perezida wa Repubulika: Paul KAGAME.
Imaze
kwemeza ibyari ku murongo w'ibyigwa, Inama y'Abaminisitiri yafashe
ibyemezo bikurikira:
1.
Inama y’Abaminisitiri yemeje imyanzuro y’ibyemezo by’Inama
y’Abaminisitiri yo ku itariki ya 13/10/2004, imaze kuyikorera
ubugororangingo.
2.
Inama y’Abaminisitiri yasuzumye umushinga w’itegeko ryerekeye
kurengera ubusugire bw’ibihangano mu rwego rw’inganda /Projet de
loi relative à la protection de la propriété industrielle au Rwanda/Draft
law on the protection of industrial property in Rwanda, isaba
Minisitiri w’Ubucuruzi, Inganda, Ishoramari, Ubukerarugendo
n’Amakoperative kuwunoza.
3.
Inama y’Abaminisitiri
yasuzumye inyandiko ya Politiki y’ubuhinzi/Politique
Agricole/Agricultural Policy irayemeza, ariko isaba ko ingamba
zijyana nayo zinonosorwa.
4.
Inama y’Abaminisitiri yemeje inyandiko yerekeye uburyo bwo
guteza imbere igihingwa cy’icyayi n’icya kawa mu
Rwanda.
5.
Inama y’Abaminisitiri yemeje inyandiko yerekeranye n’uburyo
Minisiteri y’Ububanyi n’amahanga n’ubutwererane yiga amadosiye
yerekeranye n’ibihugu byandika bisaba gushyigikirwa mu myanya
itandukanye mu miryango mpuzamahanga.
6.
Inama y’Abaminisitiri yemeje umushinga w’itegeko ryerekeye
ifunga kandi rishyiraho rikanagena imitunganyirize y’urwego rw’Igihugu
rushinzwe imirimo ya za Gereza.
7.
Inama y’Abaminisitiri yemeje iteka rya Minisitiri w’Intebe
rihindura iteka rya Minisitiri w’Intebe n°84/03 ryo ku wa 23/12/2002
rishyiraho abagize Inama y’ubutegetsi y’Ikigega Rusange cya Leta
Gitsura Amajyambere y’Uturere, Imijyi n’Umujyi wa Kigali kandi
rikagena umubare wabo, manda n’ibyo bagomba kuba
bujuje.
8.
Mu bindi:
a) Minisitiri w’Umutekano mu Gihugu
yamenyesheje Inama y’Abaminisitiri ko hari ibikorwa by’ubwicanyi
bimaze iminsi bibera mu Turere dutandukanye, bikorwa n’abantu bagifite
ingangabitekerezo ya jenoside.
Inama
y’Abaminisitiri yasabye inzego z’ubutabera kwihutisha irangiza
ry’imanza cyane cyane
izirebana no kwica abacitse ku icumu, abatanga buhamya n’abafata abana
ku ngufu, kugirango bahanwe uko bikwiye kandi bibere bose
urugero.
b) Minisitiri w’Ububanyi n’Amahanga
n’Ubutwererane yamenyesheje Inama y’Abaminisitiri ko kuva ku wa 25
kugeza ku wa 26/10/2004 i Kigali hazateranira Inama y’Abaminisitiri
b’ububanyi n’amahanga ihuza ibihugu by’u Rwanda, Uganda na Repubulika
Iharanira Demokarasi ya Kongo.
c) Minisitiri w’Abakozi ba Leta,
Amahugurwa, Imyuga Iciriritse n’Umurimo yamenyesheje Inama
y’Abaminisitiri ko, Ishuri
ryigisha ubutegetsi no gucunga umutungo (RIAM) rigiye gufatanya
n’Ishuri ryigisha ubutegetsi no gucunga umutungo (ENAP) ryo muri
Québec, mu gutangiza gahunda yo kwigisha inyigisho zitanga
impamyabushobozi ihanitse mu by’ubutegetsi no gucunga umutungo.