None ku wa mbere tariki ya 20 Ukuboza
2004, Inama y’Abaminisitiri idasanzwe yateraniye muri Village
Urugwiro, iyobowe na Nyakubahwa Perezida wa Repubulika: Paul
KAGAME.
Imaze
kwemeza gahunda y’inama, Inama y'Abaminisitiri yafashe ibyemezo
bikurikira:
1.
Inama y’Abaminisitiri yemeje ibyemezo by’Inama y’Abaminisitiri
yo ku itariki ya 15/12/2004, imaze kubikorera
ubugororangingo.
2.
Inama y’Abaminisitiri yasuzumye inyandiko yerekeranye
n’igikorwa cyo kubaka umuyoboro w’amashanyarazi KORA-KALISIMBI, yemeza
ko TERRACOM ariyo izawubaka, ikazagirana amasezerano na
Leta.
3.
Inama y’Abaminisitiri yasuzumye umushinga wo kubaka
icyambu cyo ku butaka cya
ISAKA (Dry Port) muri Tanzania ; uwo mushinga uri mu
kibanza gifite ubuso bwa 17,5 ha, Leta ya Tanzania yahaye u Rwanda.
Inama
y’Abaminisitiri yemeje ko Leta itanga amafaranga yo
kukizitira.
4.
Inama y’Abaminisitiri yunguranye ibitekerezo ku myanzuro
y’isuzuma -due diligence – ryakozwe kuri «Dane Associates» mu rwego
rw’amasezerano Leta y’u Rwanda yagirana nayo, yerekeye kubyaza
amashanyarazi umwuka wa «methane gas/gaz méthane» wo mu Kiyaga cya
Kivu, yemeza ko Leta izagirana amasezerano n’iyo sosiyete, ari uko
yemeye gufatanya na Wartsila na Ludan zizwiho ubushobozi mu rwego rwa
tekinoloji. Yemeje kandi ko ibyerekeye amategeko agenga iyo kontaro
anonosorwa, hakanashakwa amafaranga yo kubishyira mu
bikorwa.
5. Inama
y’Abaminisitiri yasuzumye inyandiko ku ivugururwa ry’igiciro
cy’amashanyarazi kugira ngo kijyane n’igihe turimo, yemeza ko igiciro
kiriho ubu kizazamuka guhera mu ntangiriro z’umwaka wa 2005, n’uko
hazashyirwaho ibiciro by’amashanyarazi bitandukanye, hakurikijwe
abafatabuguzi n’ubushobozi bwabo.
Inama
y’Abaminisititi ikaba isaba Abanyarwanda kumva impamvu zabyo.
6. Inama
y’Abaminisitiri yagejejweho inyandiko (progress report) ijyanye n’aho
ibyo kwegurira RWANDATEL abikorera ku giti cyabo bigeze, yemeza ko
TERRACOM ariyo yabaye iya mbere mu kugaragaza ubushobozi muri
tekinoloji (meilleur soumissionnaire/preferred bidder).
Hazakurikiraho
kumvikana nayo ku mafaranga izatanga mbere yo gushyira umukono ku
masezerano yazagirana na Leta.
7. Inama
y’Abaminisitiri yasuzumye inyandiko ijyanye n’ibyagezweho mu
isuzumamikorere ry’abakozi bo mu Ntara,
irayemeza.
8. Inama
y’Abaminisitiri yemeje inyandiko y’ingengo y’imari ikenewe n’intumwa
z’u Rwanda muri «Joint Verification Mechanism» u Rwanda ruhuriyeho na
Repubulika Iharanira Demokarasi ya Kongo.
9. Inama
y’Abaminisitiri yemeje amateka ya Minisitiri ashyiraho :
- Abanditsi
b’Urukiko Rukuru rwa Gisirikare,
- Abanditsi b’Urukiko rwa
Gisirikare,
- Abagenzacyaha ba
Gisirikare.
10. Inama
y’Abaminisitiri yemeje ko Bwana RUVEBANA Antoine aba «Attaché
Commercial» muri Ambasade y’u Rwanda i Genève, mu Busuwisi,
akazakurikirana by’umwihariko imirimo y’Umuryango Mpuzamahanga
w’Ubucuruzi-W.T.O/O.M.C
11. Inama
y’Abaminisitiri yemeje ko Madame KAYITESI Zaïnabo aba umukandida w’u
Rwanda muri Komisiyo ya LONI ishinzwe Uburenganzira bwa muntu (Haut
Commissariat des Nations Unies aux Droits de l’Homme/Hight Commission
for Human Rights) ikorera i Genève mu Busuwisi. Uwo mwanya ubangikana
n’indi mirimo uwatowe asanzwe akora.
12. Mu
bindi:
a) Minisitiri w’Umutekano mu Gihugu
yagejeje ku Nama y’Abaminisitiri iby’ubutumwa yari avuyemo mu
Kirwa cya Maurice mu Nama y’Abaminisitiri ba Afurika basuzumye raporo
yo kurwanya ibiyobyabwenge n’ubwicanyi bujyana nabyo.
b) Minisitiri w’Uburezi, Ubumenyi,
Ikoranabuhanga n’Ubushakashatsi yamenyesheje Inama y’Abaminisitiri
ibikubiye mu itangazo rigenewe Abanyamakuru ryerekeye bamwe mu
bayobozi, abarimu n’abandi bakozi bo mu mashuri yisumbuye bari
bavuzweho ibyaha binyuranye by’amacakubiri, gusambanya abanyeshuri
n’indi myitwarire mibi, hakaza kugaragara ko nta bimenyetso bifatika
bibahama, bakazahabwa
amabaruwa abahesha uburenganzira bwo gusubira ku kazi kabo cyangwa
gusubira mu mashuri.
c) Minisitiri w’Ubucuruzi, Inganda,
Guteza Imbere Ishoramari, Ubukerarugendo n’Amakoperative yageje ku
Nama y’Abaminisitiri raporo y’ubutumwa yagiyemo mu gihugu
cy’Ubwongereza - muri
World Travel Market -, kuva ku itariki ya 8 kugeza ku ya
11/11/2004.