None kuwa gatatu tariki ya 21 Kamena 2006, Inama y'Abaminisitiri yateraniye muri Village Urugwiro, iyobowe na Nyakubahwa Perezida wa Repubulika, Paul KAGAME.
Imaze kwemeza gahunda y'inama, Inama y'Abaminisitiri yafashe ibyemezo bikurikira :
1. Inama y'Abaminisitiri yemeje ibyemezo by'Inama y'Abaminisitiri yo ku itariki ya 14/06/2006 imaze kubikorera ubugororangingo.
2. Inama y'Abaminisitiri yemeje u mushinga w'itegeko rihindura itegeko n° 30/2005 ryo ku wa 23/12/2005 rigena imari ya Leta y'umwaka wa 2006.
3. Inama y'Abaminisitiri yasuzumye kandi yemeza inyandiko yerekeye Umuryango uhuza Ibihugu by'Afurika y'Iburasirazuba (East African Community) yateguwe na « National Committee on Regional Integration » mu rwego rw'imishyikirano izaba hagati y'u Rwanda n'ibihugu biri muri uwo Muryango.
4. Inama y'Abaminisitiri yemeje politiki, ingamba na gahunda y'ibikorwa bya Minisiteri y'Ububanyi n'Amahanga n'Ubutwererane
5. Inama y'Abaminisitiri yemeje ko Bwana RUNIGA Pierre Claver aba Umunyamabanga Wihariye wa Visi Perezida w'Urukiko rw'Ikirenga.
6. Inama y'Abaminisitiri yemeje ko hazubakwa :
- Urugomero rw'amashanyarazi ku mugezi wa Rukarara;
- Urugomero rw'amashanyarazi ku mugezi wa Nyabarongo;
- Ingomero cumi (10) ntoya z'amashanyarazi hirya no hino mu gihugu.
7. Mu bindi:
- Minisitiri w'Urubyiruko, Umuco na Siporo yamenyesheje Inama y'Abaminisitiri ko:
i) ku itariki ya 02/07/2006 u Rwanda ruzibuka abanyapolitiki bazize jenoside. Uwo muhango uzabera kuri Rebero mu Karere ka Kicukiro.
ii) Mu mpera z'uku kwezi kwa gatandatu 2006, hazerekanwa Film yiswe “ Rwanda 94”yakozwe na Groupov.
iii) Ku itariki ya 30/06/2006 i Nyanza hazizihizwa umunsi mpuzamahanga w'ururimi kavukire.
- Umunyamabanga wa Leta ushinzwe Ubutwererane muri Minisiteri y'Ububanyi n'Amahanga n'Ubutwererane yagejeje ku Nama y'Abaminisitiri, “memorandum” irebana n'inama hagati y'intumwa z'u Rwanda n'iz'igihugu cya Tanzaniya ku kibazo cy'Abanyarwanda birukanwa mu Ntara ya Kagera iteganywa mu matariki ya 21-23/06/2006.
Kigali, kuwa 21/06/2006
Minisitiri
muri Primature ushinzwe Itangazamakuru