None kuwa gatatu tariki ya 26 Ukwakira 2005, Inama y'Abaminisitiri yateraniye muri Village Urugwiro, iyobowe na Nyakubahwa Perezida wa Repubulika, Paul KAGAME.
Imaze kwemeza gahunda y'inama, Inama y'Abaminisitiri yafashe ibyemezo bikurikira :
1. Inama y'Abaminisitiri yemeje ibyemezo by'Inama y'Abaminisitiri byo ku itariki ya 12/10/2005 imaze kubikorera ubugororangingo.
2. Inama y'Abaminisitiri yemeje :
- Umushinga w'Itegeko ryerekeye ishyirwaho n'imikorere y'Ikigo cy'Igihugu gishinzwe kugenzura imitunganyirize y'amasoko ya Leta/Draft law establishing the Public Procurement Regulatory Authority/ Projet de loi portant création et fonctionnement de l'Office National de Régulation des Marchés Publics;
- Umushinga w'Itegeko rigenga amasoko ya Leta/ Draft law on Public Procurement/Projet de loi portant réglementation générale des marchés publics.
3. Inama y'Abaminisitiri yemeje :
- Umushinga wa Politiki y'Igihugu yo kurengera no guteza imbere imibereho myiza.
- Umushinga w'itegeko rirengera abageze mu zabukuru;
- Umushinga w'itegeko rirengera abamugaye muri rusange;
- Umushinga wa politiki yo kurengera abari mu ngabo bamugariye ku rugamba;
- Umushinga w'Itegeko rirengera abari mu ngabo bamugariye ku rugamba.
4. Inama y'Abaminisitiri yemeje ko Inzu ya IMPRISCO iri i Remera ikoreshwa nk'ububiko bw'ibizamini, ikurwa ku rutonde rw'umutungo wa IMPRISCO ugurishwa, ikegurirwa MINEDUC.
5. Inama y'Abaminisitiri yemeje umushinga w'Itegeko ryemerera kwemeza burundu amasezerano hagati ya Repubulika y'u Rwanda na FIDA yerekeranye n'inguzanyo ya 5.650.000 DTS n'impano ya 140.000 DTS agenewe umushinga w'ishyirwa mu bikorwa rya gahunda yo kuvugurura ubuhinzi .
6 Inama y'Abaminisitiri yemeje :
- Inyandiko ikubiyemo incamake y'igenzura ryakozwe muri za Ambasade z'u Rwanda kuva muri 2002 kugeza 2005 hamwe na “Cabinet paper” yerekana ibibazo by'ingenzi byagaragaye mu iryo genzura n'imwe mu miti yabyo, isaba ko abahamwa n'amakosa bavugwaho bakurikiranwa.
- Iteka rya Perezida ryemeza burundu Amasezerano nyafurika agamije guteza imbere ubwikorezi bukorerwa mu mazi (African Maritime Transport Charter/Charte Africaine des Transports Maritimes).
- Iteka rya Perezida ryemeza burundu amwe mu masezerano mpuzamahanga yerekeye uburenganzira bwa muntu, ayo ni:
• Amasezerano yerekeye amategeko agenga abantu batagira ubwenegihugu;
• Amasezerano yerekeye kugabanya ukutagira ubwenegihugu.
7. Inama y'Abaminisitiri yemeje ko Bwana Varol OZKOCAK ahagararira igihugu cye cya Turkiya mu Rwanda ku rwego rwa Ambasaderi ufite icyicaro i Nairobi .
8. Inama y'Abaminisitiri yemeje
- Iteka rya Perezida ryirukana burundu umupolisi wo mu rwego rwa ba Ofisiye bisumbuye/Senior Officer/Officier Supérieur, uwo ni SUPT Jean Bosco MULINDAHABI.
- Iteka rya Minisitiri w'Intebe ryirukana burundu umupolisi wo mu rwego rwa Ofisiye muto, uwo ni Junior Officer/Officier Subalterne, AIP Charles KABALISA.
- Iteka rya Minisitiri ryirukana burundu Abapolisi 36 bo mu rwego rwa Su-Ofisiye n'urw'Abapolisi bato.
9. Inama y'Abaminisitiri yemeje Iteka rya Minisitiri w'Intebe rishyiraho Perezida w'Urukiko rwa Gisirikare : Jenerali Majoro KARENZI KARAKE.
10. Inama y'Abaminisitiri yagejejweho amabwiriza yatanzwe kugira ngo hakumirwe indwara ya “grippe/flu” y'inyoni.
11. Inama y'Abaminisitiri yongeye gusaba ko isuku ikomeza kwitabwaho mu ma hoteri no mu maresitora, bitaba ibyo agafungwa.
12. Mu bindi :
- Minisitiri w'Ubuhinzi n'Ubworozi yagejeje ku Nama y'Abaminisitiri aho imyiteguro y'Inama ya 7 y'Abaminisitiri bo mu bihugu bigize Umuryango wa Afurika yunze Ubumwe bafite ubworozi mu nshingano zabo igeze. Iyo nama izabera i Kigali ku itariki ya 3 n'iya 4 Ugushyingo 2005, igeze.
Yanayimenyesheje ingamba zafashwe kugira ngo harwanywe indwara y'uburenge yagaraye mu Karere ka Nyarubuye, Intara ya Kibungo.
- Minisitiri w'Imari n'Igenamigambi yamenyesheje Inama y'Abaminisitiri ko ku itariki ya 1 n'iya 2 Ukuboza 2005 i Kigali hazateranira inama ya 5 y'Abaterankunga.
- Umunyamabanga wa Leta ushinzwe Ingufu n'Itumanaho muri Minisiteri y'Ibikorwa Remezo yamenyesheje Inama y'Abaminisitiri :
- Iby'urugendo avuyemo mu gihugu cy'Ubushinwa n'icya Korea y'Epfo, aho yagiye kureba aho iterambere ry'ibyo bihugu mu ikoranabuhanga mu by'itumanaho rigeze.
- Ingamba zafashwe kugira ngo ibibazo by'itumanaho biri muri MTN Rwandacell muri iki gihe bibonerwe umuti.
- Ibya gahunda yo gukoresha “Biogaz” mu cyaro mu rwego rw'ubutwererane bw'u Rwanda n'Ubuhorandi.
- Umunyamabanga wa Leta ushinzwe kurwanya SIDA n'izindi ndwara z'Ibyorezo muri Minisiteri y'Ubuzima yamenyesheje Inama y'Abaminisitiri aho ubushakashatsi ku rukingo rwa SIDA ibihugu bya Afurika bikorana na African Aids Vaccine Program bugeze.
Ku bireba ubushakashatsi bukorerwa mu Rwanda , Umushinga San Francisco wabonye igihembo kubera uburyo (méthodologie/methodology) ukoresha.
Kigali, kuwa 26/10/2005
Minisitiri
muri Primature ushinzwe Itangazamakuru