None kuwa gatatu tariki ya 28 G ashyantare 2007, Inama y'Abaminisitiri yateraniye muri Village Urugwiro, iyobowe na Nyakubahwa Perezida wa Repubulika : Paul KAGAME.
Imaze kwemeza gahunda y'inama, Inama y'Abaminisitiri yafashe ibyemezo bikurikira:
1. Inama y'Abaminisitiri yemeje ibyemezo by'Inama y'Abaminisitiri yo ku matariki ya 17/01/2006 na 23/01/2007, imaze kubikorera ubugororangingo .
2. Inama y'Abaminisitiri yemeje u rutonde rw'Abashinjacyaha ku buryo bukurikira:
a) Abashinjacyaha 6 bayobora ubushinjacyaha ku rwego rwisumbuye; abo ni :
- GATAMBIYE Sylvère;
- NTAGENGWA Vital;
- MURUNGI Rosette;
- MUKURALINDA Alain Bernard;
- UWOMBONYE Hirwa Sudi;
- MUGABO Déo Lambert.
b) Abashinjacyaha 17 bo ku rwego rwisumbuye.
c) Abashinjacyaha 15 bo ku rwego rw'ibanze.
3. Inama y'Abaminisitiri yemeje umushinga w'itegeko ryerekeye i shyirwaho, imikorere, ububasha n'imitunganyirize y'Ikigo cy'Igihugu gishinzwe iby'ubutaka ( National Land Center - NLC).
4. Inama y'Abaminisitiri yemeje:
a) Iteka rya Perezida rishyiraho za Gereza mu Rwanda n'uburyo zubakwa;
b) Iteka rya Minisitiri w'Intebe rigena Imitunganyirize, Imiterere n'imbonerahamwe by'inzego z'imirimo ya Gereza;
c) Inzego z'imirimo (Job Classification / Classification des Emplois) z'abacungagereza;
d) Iteka rya Minisitiri w'Intebe rigena imishahara y'Abacungagereza.
5 . Inama y'Abaminisitiri yemeje ko Ur wibutso rwa jenoside i Rebero mu Mujyi wa Kigali rwubakwa neza rukajya mu murage ndangamuco w'Igihugu ; umunsi wo kwibuka abanyapolitiki bahashyinguwe uzajya uba kuwa 6 wo mu cyumweru cy'icyunamo;
Insanganyamatsiko y'urwo Rwibutso ni « Duharanire imiyoborere myiza ».
Inama y'Abaminisitiri yemeje kandi ko uyu mwaka wa 2007, imihango yo kwibuka jenoside ku nshuro ya 13 ku rwego rw'Igihugu, izabera i Murambi mu Karere ka Nyamagabe mu Ntara y'Amajyepfo.Insanganyamatsiko y'uwo munsi ni : Twibuke jenoside twita ku bacitse ku icumu kandi duharanira ubutabera.
6. Inama y'Abaminisitiri yemeje “ State Protocol Guide /Guide du Protocole
d'Etat ” .
7. Inama y'Abaminisitiri yemeje ko hashyirwaho urwego rushinzwe Abanyarwanda baba mu mahanga (Diaspora).
8. Inama y'Abaminisitiri yemeje ko:
a) Bwana Young-Jun KIM ahagararira mu Rwanda igihugu cye cya Korea y'Amajyepfo ku rwego rwa Ambasaderi ufite icyicaro i Dar es Salaam muri Tanzania;
b) Bwana CHURUBU Daniel ahagararira mu Rwanda igihugu cye cya Argentine ku rwego rwa Ambasaderi ufite icyicaro i Nairobi muri Kenya;
c) Bwana Lutfy A.M. AI MAGHRIB ahagararira mu Rwanda igihugu cye cya Libiya ku rwego rwa Ambasaderi ;
d) Madamu Thérèse ZERBA ahagararira mu Rwanda Ishami ry'Umuryango w'Abibumbye rishinzwe Abaturage (United Nations Population Fund, UNFPA) .
9. Inama y'Abaminisitiri yemeje :
a) Umushinga w'Itegeko ryemerera kwemeza burundu Amasezerano y'impano ( n° H 253-RW ) yashyiriweho umukono i Washington muri Leta Zunze Ubumwe za Amerika kuwa 19 Ukuboza 2006, hagati ya Repubulika y'u Rwanda n'Ikigega cy'Isi Gitsura Amajyambere (IDA), yerekeranye n'impano ingana na 6,900,000 z'amadetesi (SDR/DTS), agenewe gutera inkunga umushinga wa e-Rwanda.
b) Umushinga w'Itegeko ryemerera kwemeza burundu Amasezerano y'impano yashyiriweho umukono i Luxembourg kuwa 25 Gicurasi 2005, ahindura amasezerano y'ubufatanye hagati y'Ibihugu bya Afurika, Karayibe na Pasifika (ACP) n'Umuryango w'Ubumwe bw'Ibihugu by'Iburayi (EU) yashyiriweho umukono i Cotonou kuwa 23 Kamena 2000.
c) Umushinga w'Itegeko ryerekeye ishyirwa mu bikorwa ry'Amasezerano agamije guca icurwa, ihunikwa n'ikoreshwa ry'intwaro z'uburozi.
d) - Umushinga w'Itegeko ryemerera kwemeza burundu Amasezerano yerekeye amategeko agenga Ikigega Nyafurika gishinzwe ubwishingizi n'ubufatanye mu by'ubukungu (FAGACE);
- Iteka rya Perezida ryemeza burundu Amasezerano yerekeye amategeko agenga Ikigega Nyafurika gishinzwe ubwishingizi n'ubufatanye mu by'ubukungu (FAGACE).
e) Umushinga w'Itegeko ryemerera kwemeza burundu Amasezerano yerekeye kurinda no guteza imbere urusobe rw'ibiranga umuco, yashyiriweho umukono i Paris kuwa 20 Ukwakira 2005.
10. Inama y'Abaminisitiri yemeje ko :
- Bwana GAHAMANYI Parfait aba Umujyanama wa Mbere muri Ambasade y'u Rwanda i Bruxelles mu Bubiligi;
- Bwana MUNGA John aba Umuyobozi wa “Public Accounts Unit” muri MINECOFIN.
Mu bindi :
a) Minisitiri w'Ubuhinzi n'Ubworozi yamenyesheje Inama y'Abaminisitiri ko :
- Ku matariki ya 26 -27 Werurwe 2007 i Kigali hazateranira inama ya ISAR ku rwego rw'Igihugu yo kwerekana ibyagezweho n'ubushakashatsi mu buhinzi n'ubworozi (National Conference on Agriculture Research Outputs);
- Ku matariki ya 29-30 Werurwe 2007 i Kigali hazateranira inama ku ishyirwa mu bikorwa rya Gahunda yo Guteza imbere Ubuhinzi muri NEPAD yiswe “CAADP (Comprehensive Africa Agriculture Development Programme) mu bihugu bya COMESA.
b) Minisitiri muri Perezidansi ushinzwe Ubumenyi, Ikoranabuhanga n'Ubushakashatsi yamenyesheje Inama y'Abaminisitiri ko ku matariki ya 23-24 Nyakanga 2007 i Kigali hazabera inama mpuzamahanga ku bushakashatsi ku rusobe rw'ibinyabuzima no gucunga ku buryo burambye umutungo kamere (International Research Conference on Biodiversity and the Sustainable Management of Natural Resources);
c) Minisitiri w'Ubutegetsi bw'Igihugu, Imiyoborere Myiza, Amajyambere Rusange n'Imibereho Myiza y'Abaturage yamenyesheje Inama y'Abaminisitiri ko kuwa kabiri tariki ya 06 Werurwe 2007 ari umunsi wo kwizihiza politiki yo kwegereza abaturage ubuyobozi n'ubushobozi (Decentralisation Day) imaze imyaka 6 ishyirwa mu bikorwa; kuri uwo munsi kandi abayobozi b'inzego zitandukanye bazasura Umurenge ntangarugero wa Mayange hanatangizwe ku mugaragaro gahunda yiswe “Vision 2020 Umurenge”.
d) Minisitiri w'Ubuzima yamenyesheje Inama y'Abaminisitiri aho imyiteguro y'Inama Mpuzamahanga (2007 HIV/AIDS Implementers Meeting) izabera i Kigali ku matariki ya 13-19 Kamena 2007, igeze.
e) Minisitiri muri Primature ushinzwe Iterambere ry'Umuryango n'iry'Uburinganire yamenyesheje Inama y'Abaminisitiri ko umunsi mpuzamahanga w'umugore uba buri mwaka kuwa 8 Werurwe uzizihizwa mu Gihugu hose; ku rwego rw'Igihugu uzizihirizwa kuri Sitadi Amahoro i Remera, aho Abanyarwanda bazishimira igihembo cyahawe Nyakubahwa Perezida wa Repubulika kubera intera ishimishije Igihugu cyacu kimaze kugeraho mu guteza imbere uburinganire.
f) Minisitiri w'Ubucuruzi, Inganda, Guteza Imbere Ishoramari, Ubukerarugendo n'Amakoperative yamenyesheje Inama y'Abaminisitiri ko u Rwanda ruzitabira imurika ry'ubukerarugendo (Tourism Exhibition) rizabera i Berlin mu Budage ku matariki ya 7-11 Werurwe 2007.
g) Umunyamabanga wa Leta muri MINICOM ushinzwe Inganda no Guteza Imbere Ishoramari yamenyesheje Inama y'Abaminisitiri iby'urugendo yagiriye Dubaï, Muscat na Doha kuva ku itariki ya 26 Mutarama kugeza ku ya 6 Gashyantare 2007.
Urwo rugendo rwabaye ingirakamaro, Inama y'Abaminisitiri yasabye ko hakorwa ibishoboka byose kugira ngo habeho umubano, ubuhahirane n'ubucuruzi hagati y'u Rwanda n'ibyo Bihugu bya Middle East .
Kigali, kuwa 28/02/2007
Minisitiri
muri Primature ushinzwe Itangazamakuru